Vüqar Mustafayev: “Əks-hücumlarda nəyəsə ümid edə bilərik”

Milli komandamızın yarımmüadafiəçisi Vüqar Mustafayev sabah DÇ-2022-nin seçmə mərhələsiçərçivəsində Portuqaliya ilə oyundan öncə açıqlama verib.

Futbolxeber.az-ın məlumatına görə, AFFA-nın rəsmi saytına danışan “Bakı”nın yetirməsi Avropa çempionlarına qarşı əzmkarlıq nümayiş etdirməli olduqlarını qeyd edib: “Seçmə mərhələnin ilk oyunudur. Bizim üçün yaxşı bir başlanğıc olacağına ümid edirəm. Portuqaliyanın gücü, futbolçuların bacarığı hamıya bəllidir. Onlara qarşı yaxşı mübarizə aparmaq üçün əzmkarlıq nümayiş etdirməliyik”.

V.Musatafayev bildirib ki, Portuqaliya kimi ilə qarşılaşmada yaxaladığın qol epizodlarını mütləq dəyərləndirməlisən: “Futbolda hər nəticə qeydə alına bilər. Qələbə də qazanmaq olar, heç-heçə də etmək olar. Onlardan daha istəkli olsaq, daha çox mübarizə aparsaq, niyə yaxşı nəticə qazanmayaq? Bu cür güclü komandalarla oyunlarda qol vəziyyəti yaratmaq elə də asan deyil. Oyun ərzində yaratdığın imkanlardan maksimum istifadə etməlisən. Hesab edirəm ki, müdafiədə daha diqqətli oynamalıyıq. Rəqib oyunu daha çox irəlidə quracağından biz əks-hücumlarda nəyəsə ümid edə bilərik”.