De Byazi: “Futbolçularda qalib psixologiyasını formalaşdırmalıyıq”

“Bizim üçün vacib oyun idi. Çətin oyun olacağını bilirdik. İlk hissədə rəqibin qol vurmaq şansları oldu. Qapıçımıza təşəkkür edirik, bizi real qoldan xilas etdi”.

Futbolxeber.az saytının məlumatına görə, bu sözləri milli komandamızın baş məşqçisi Canni De Byazi UEFA Millətlər Liqasının son turunda Lüksemburqa qarşı keçirilən qarşılaşmadan (0:0) sonra deyib.

İtaliyalı mütəxəssis bildirib ki, komandasının daha yaxşı oynamaq üçün imkanı var: “Bədavi Hüseynovun zədələnməsi oyun planımızı pozdu. Onun əvəzlənməsindən sonra oyun planımız dəyişdi. Daha yaxşı oyun nümayiş etdirmək istəyirdik. Texniki və taktiki cəhətdən daha yaxşı oynaya bilərdik. Bunun üçün imkanlarımız vardı”.

De Byazi vurğulayıb ki, milli üzvlərində qələbə psixologiyası formalaşmalıdır: “COVİD-19 pandemiyası planlarımızı pozdu. Qrupun ilk oyununa daha yaxşı hazırlaşa bilmədik. Bu komandanın potensialı var. Futbolçuları inandırmalı və onlarda qalib psixologiyasını formalaşdırmalıyıq. Düzgün yolda olduğumuzu düşünürəm. Nizam-intizamı olan və yeri gələndə aqressiv futbol oynamağı bacaran komandamız var”.

O bildirib ki, DÇ-2022-nin seçmə mərhələsinə kimi 2 yoxlama oyunu keçirilməsini istəyir: “Mart ayınadək rəsmi oyunlar yoxdur, rəhbərliklə danışmalıyq. Bəzi təşkilatı işlər görüldükdən sonra yanvar ayının sonu fevralın əvvəlində təlim-məşq toplanışı və iki yoxlama oyunu keçirməyi planlaşdırırıq”.