“Sabah”ın 35 yaşlı yeni transferi ilə bağlı ilginc faktlar

Ötən mövsüm fiaskoya uğrayan, xərclənən milyonların qarşısında heç bir nəticə qazana bilməyən “Sabah” yeni mövsümə ciddi hazırlaşır. Yeni baş məşqçi, yeni transferlər, yoxlama oyunlarında qələbələr...

İlk başda hər şey yaxşı görünsə də, reallıq fərqlidir.

Avqustun 2-də “Sabah” növbəti transferini reallaşdırdı. Məlum oldu ki, paytaxt klubu 2 gün əvvəl 35 yaşına qədəm qoyan monteneqrolu müdafiəçi Nikola Vuyadinoviçlə bir illik müqavilə bağlayıb. İlk başda qəribə görünən yalnız Vuyadinoviçin yaşıdı. Hər halda 35 yaşlı legioneri hər klub transfer etməz. Axı heyətə qatılan Mikael Essyen və ya başqa dünya ulduzu deyil... Bu halda maraqlıdır, “Sabah” rəhbərliyi hansı istedadına görə Nikola Vuyadinoviçi transfer edib? Bəlkə mərkəz müdafiəçisinin hansısa qeyri-adi, bilmədiyimiz bacarığı var? Buna görə də Vuyadinoviçlə bağlı kiçik araşdırma apardıq və üzə ilginc məqamlar çıxdı.

İlk diqqətçəkən məqam futbolçunun son 4 rəsmi oyundan 3-də meydandan qovulmasıdır.  

“Siftə” Sloveniya çempionatının 26-cı turunda “Maribor”la oyunda reallaşıb. Vuyadinoviç 77-ci dəqiqədə meydandan qovulmaqla yanaşı, penaltiyə də səbəb olub. 11 metrlik cərimə zərbəsindən qapısında qol görən “Domjale” 81-ci dəqiqədə daha bir dəfə rəqibin fərqlənməsinə mane ola bilməyib. Beləcə, Vuyadinoviçin meydandan qovulmasından sonra komandası hesabda öndə olduğu görüşdən xalsız ayrılıb.

29-cu turda Nikola yenidən qırmızı vərəqə alıb. Bu dəfə o, “Olimpiya Lyublyana” ilə görüşdə komandasını azlıqda qoyub.

İyulun 11-də, Sloveniya çempionatının 33-cü turunda “Domjale” öz meydanında “Bravo”nu sınağa çəkib. Qarşılaşmanın 78-ci dəqiqəsində Vuyadinoviç meydana çıxdığı 4-cü oyunda ardıcıl 3-cü qırmızı vərəqəsini almaqla dünya futbolunda bəlkə də bu vaxta qədər heç kimin imza atmadığı antirekord müəllifi olub. Nikola meydandan qovulana qədər komandası hesabda öndə olsa da, “Domjale” azlıqda qaldıqdan sonra yenidən qələbəni əldən verib. 

Videoda Nikola Vuyadinoviçin aldığı həmin qırmızı vərəqələri gördünüz. Epizodları şərh etməyi öhdənizə buraxırıq. Yaş çoxluğu, lənglik, ya...

Nikola Vuyadinoviçlə bağlı diqqətçəkən məqam digər məqam odur ki, “Soccerassociation”da futbolçunun adı üzərindən xətt çəkilib.

Bu, nə deməkdir? “Soccerassociation”da futbolçunun adının üzərindən xətt çəkilməsi o anlamı verir ki, həmin futbolçu artıq karyerasını başa vurub. “Soccerassociation”ın Nikola Vuyadinoviçin karyerasını bitirməsi haqda hardan məlumat əldə etdiyini söyləmək çətindir. Ola bilər, futbolçu özü bu haqda açıqlama versin, ya bu informasiya hansısa mənbədə çıxıb, yaxud da məlumat klub tərəfindən yayılıb. Lakin istənilən halda “Soccerassociation”da Nikola Vuyadinoviçin karyerasını bitirib kimi göstərilməsi çox şübhəli məqamdır.

Bu keçidlə bağlı üçüncü diqqətçəkən məqam futbolçunun məvacibi ilə bağlıdır. Belə ki, Nikola Vuyadinoviçin “Domjale”dəki aylıq məvacibi maksimum 2 min avro təşkil edib. “Sabah”da isə o, əvvəlki iş yerindən 4-5 dəfə çox qazanacaq. Çünki məlumdur ki, “Sabah”da demək olar ki, heç bir legioner ayda 10 mindən az qazanmır.

FUTBOLXEBER.AZ