Ələkbərov 76-cı oldu

Premyer Liqanın 5-ci turu çərçivəsində keçirilən “İnter” - “Simurq” matçı bəzi statistik göstəricilərlə də yadda qaldı. Futbolxeber.az-ın məlumatına görə, matçın 31-ci dəqiqəsində “Simurq”un qapısını dəqiq hədəfə alan "İnter"in gənc yarımmüdafiəçisi İlqar Ələkbərov “İnter”in Azərbaycan Çempionatı oyunlarında qol vurmaqla fərqlənən sayca 76-cı futbolçusu oldu.

Bu mövsümdə bu siyahıya öncə Vaqif Cavadov, Ruslan Əmircanov və Brüs Abdulaye daxil olmuşdular. Vaqif Cavadov bu mövsüm “İnter”in heyətində birinci olsa da, Ruslan Əmircanov və Brüs Abdulaye komandada ötən ildən çıxış edirdilər, amma Premyer Liqanın 2012-13-cü il mövsümündə qol vurmaqla fərqlənə bilməmişdilər.

Qeyd edək ki, “İnter”in heyətində ən yaxşı bombardir Xaqani Məmmədovdur, onun aktivində 28 qol var. Rəqibin qapısından 6 az top keçirmiş futbolçu uruqvaylı Valter Quqlemondur. Baçana Tsxadadzenin avtivində 18, Robertas Poşkusun aktivindəsə 14 qol var.

Əlavə edək ki, 2004-cü ildən başlayaraq “İnter” 269 matç keçirib. 145 oyunda komanda qələbə qazanmış, 71 oyunda heç-heçə qeydə alınmış və 53 qarşılaşma “İnter”in məğlubiyyətilə başa çatıb. Bu matçlarda "İnter" 377 qol vurub, qapısından 188 qol buraxıb.