De Byazinin təyinatına sözardı

Dünən milli komandamızın yeni baş məşqçisinin adı məlum oldu. Bu, Canluici de Byazidir. İtaliyalı mütəxəssis dünya futbolunda daha əvvəl yığmamızı çalışdırmış Karlos Alberto Torres, Berti Foqts kimi tanınmış sima olmasa da, son illər işi ilə adından söz etdirə bilib. Dünya futbolu onu böyük ölçüdə 2016-cı ildə Albaniya millisində qazandığı uğurla tanıyıb...

CİANNİ DE BYAZİ KİMDİ?

Peşəkar futbolçu karyerasına “Trevizo”da başlayıb. Futbolçu kimi ən böyük uğuru “İnter”ə transfer olan Cianni əsasən “Breşiya” və “Palermo” kimi ortabablarda daha çox forma geyib. Məşqçi karyerası ərzində SPAL, “Modena”, “Breşiya”, “Torino”, “Levante”, “Udineze”ni çalışdıran 64 yaşlı mütəxəssis 4 il əvvəl Albaniya yığmasının sükanı arxasında ən böyük uğuruna imza atıb.

Fransada keçirilən qitə birinciliyinin seçmə mərhələsinin püşk atmasından sonra 5 ölkənin yer aldığı I qrupda kağız üzərində hər şey aydın idi. Gələcək qitə çempionu Portuqaliya qrupun favoriti idi, Danimarka və Serbiya ikinci kimi birbaşa Avro-2016-ya vəsiqə qazanmaq uğrunda yarışacaqdılar. Bu mübarizədən məğlub ayrılacaq tərəfin qrup üçüncüsü kimi pley-off qarşılaşmalarına qatılacağı ehtimal olunurdu. Albaniya və Ermənistana isə qrupun aşkar autsayderi gözü ilə baxılırdı. Lakin tsiklin ilk oyununda Byazinin komandası səfərdə Portuqaliyaya 1:0 hesabı ilə qalib gəlməklə sensasiyaya imza atdı. Ardınca Danimarka Albaniya səfərindən yalnız sona 9 dəqiqə qalmış vurduğu qol sayəsində 1 xalla qayıda bildi. Serblər üzərində texniki, ermənilər üzərində isə əzmkar qələbədən sonra Albaniya ilk dövrəni 10 xalla başa vurdu. Ardınca Byazini yetirmələri Danimarka səfərindən də heç-heçə ilə (0:0) qayıtmaqla Avro-2016-ya bir qədər də yaxınlaşdılar. Lakin sonradan komanda Portuqaliya və Serbiyaya uduzsa da, son turda Yerevanda erməniləri darmadağın etməklə Albaniya yığması 14 xalla Danimarka, Serbiya və Ermənistanı geridə qoyaraq qrupda ikinci yeri tutdu və tarixində ilk dəfə Avropa çempionatına vəsiqə qazandı.

Məşqçi kimi qitə birinciliyinə yollanmaq hələlik de Byazinin 18 yaşında başladığı futbol karyerasının ən yüksək zirvəsidir. Fransadakı Avropa çempionatında A qrupunda yer alan albanların rəqibləri kifayət qədər güclü idi: meydan sahibi Fransa, İsveçrə və Rumıniya. İlk matçda İsveçrəyə erkən qolla uduzan albanlar növbəti turda Fransa qarşısında 90 dəqiqə ərzində qapılarını toxunulmaz saxlasalar da, yenilgidən qaçmaq mümkün olmadı. Son turda isə Byazinin komandası Rumıniyanı məğlub etməklə (1:0) tarixində ilk dəfə qatıldığı Avropa çempionatında həm də birinci qələbəsini qazandı.

SEÇİM DÜZGÜNDÜ

Təbii ki, indiki məqamda de Byazinin təyinatının nə qədər uğurlu olub-olmayacağını heç birimiz bilə bilmərik. Amma bəzi məqamlar var ki, onlar seçimin doğru olduğunu düşünməyə əsas verir. Daha əvvəl də qeyd etdik ki, öncəki illərdə milli komandamıza Karlos Alberto Torres, Berti Foqts kimi məşqçilər rəhbərlik edib. Onların təyinatında ad məsələsi mühüm rol oynayıb. Bu dəfə də eyni vəziyyət Roy Kinlə bağlı idi. Məşqçi kimi uğur qazanmasa da, ad olaraq Roy Kin dünya futbolunda kifayət qədər tanınmış simadır. Onun sayəsində Azərbaycan haqda məlumatsız olan sıravi britaniyalı da ölkəmizi tanıyacaqdı. Lakin bu təyinat çətin ki millimizə xeyir verərdi. İcraiyyə Komitəsi də düzgün qərar qəbul edərək, maddi baxımdan “qiymət oxuyan”, üstəlik, Azərbaycana yalnız toplanışdan toplanışa gəlmək fikrində olan britaniyalını nazı ilə çox oynamadı və seçimi de Byazinin lehinə etdi. Maddi baxım demişkən, Albaniya millisində ayına 20 min avro əmək haqqı alan italiyalının yığmamızdakı qazancı da aşağı-yuxarı həmin qədər olacaq ki, bu da demək olar yığmamızın sabiq çalışdırıcılar - Qurban Qurbanov və Nikola Yurçeviçin aylıq əmək haqqısı ilə eynidir.   

İcraiyyə Komitəsindən söz düşmüşkən, adətən bu qurumun toplantılarının formal xarakter daşıdığı bildirilir. Qeyd olunur ki, komitə irəli sürülən təklifə yalnız “hə” deməklə kifayətlənir. Lakin yığmamızın çalışdırıcısı ilə bağlı səsvermənin nəticəsi göstərir ki, budəfəki toplantı qızğın müzakirələrə yol açıb. 13 üzvdən yalnız 8-i de Byazinin təyinatını dəstəkləyib...

BİZDƏ DAĞA ÇIXAN LAZIMDI, DAĞDAN ENƏN YOX

2004-cü ildən bu yana Azərbaycan futbolunda bir çox tanınmış məşqçilər çalışıb. Lakin tanınmış mütəxəssislərin demək olar ki, heç biri ölkəmizdə ciddi uğur qazana bilməyiblər: Con Toşak, Karlos Alberto Torres, Berti Foqts, Anatoli Konkov, Rasim Kara, Mustafa Denizli, Bülənt Qorxmaz, Vinfred Şefer, Aleksandr Starkov, Milinko Pantiç, Yuri Syomin və digərləri. Ölkəmizdə çalışana qədər bir çox uğurlara imza atan bu mütəxəssislər Azərbaycana sanki növbəti macəra ardınca gəliblər. Müəyyən qədər ölkəmizdə işləyib, büdcələrini bir qədər də zənginləşdirib gediblər. Əvəzində uğura ac olanlar - Kaxaber Sxadadze, Coko Haciyevski, Cüneyt Biçər, Roman Qriqorçuk kimi mütəxəssislər adlarından söz etdirməyi bacarıblar. Necə deyərlər, Azərbaycan futboluna dağa çıxanlar lazımdı, dağdan enənlər yox. Elə bu nöqteyi-nəzərdən də Roy Kinlə müqayisədə Cianni de Byazinin təyinatı uğurlu seçimdi.

MİLLƏTLƏR LİQASI PRİORİTET OLMAMALIDI!

De Byazinin millimizdəki ilk sınağı Millət Liqasında olacaq. Yığmamız bu yarışda Monteneqro, Kipr və Lüksemburqla eyni qrupda yarışacaq. Əslində, bu turnir italiyalının işinə qiymət vermək baxımından prioritet hesab olunmamalıdı. Çünki Millətlər Liqası bu dəfə bizim üçün böyük önəm kəsb etmir. Ötən yarışda qrup və divizion qalibi olmaqla Avro-2020-yə vəsiqə qazana bilərdiksə, bu dəfə belə bir ehtimal yoxdur. Yəni sadə dildə desək, qrupda birinci və ya sonuncu olmağımız nəyisə dəyişməyəcək. Ona görə düşünürük ki, AFFA rəhbərliyi də de Byazinin qarşısına bu yarışla bağlı hər hansı məqsəd qoymamalıdı. İtaliyalı mütəxəssisə vaxt verilməli və əsas hədəf Qətərdə keçiriləcək dünya çempionatının seçmə mərhələsi olmalıdır. Təbii ki, yığmamızın hər oyunda qalib gəlməsini hər birimiz istərik. Lakin bir daha qeyd edək ki, Millətlər Liqasında qrupda birinci olmaqla sonuncu olmaq arasında ciddi fərq yoxdu. Əsas odur ki, de Byazi gələn ilə kimi, növbəti seçmə mərhələyə qədər döyüşkən kollektiv formalaşdırsın. 64 yaşlı mütəxəssisin işinə məhz növbəti seçmə mərhələdə qiymət verilməlidi.

FUTBOLXEBER.AZ