“Keşlə” bürünc medallarına qovuşdu, sıra “Neftçi”dədi - ÖZƏL

Azərbaycan Premyer Liqasının 2019/2020 mövsümünün gümüş və bürünc mükafatçıları - “Neftçi” və “Keşlə” bu gün medallarına qovuşur.

Futbolxeber.az saytının məlumatına görə, az əvvəl Peşəkar Futbol Liqasının prezidenti Ramin Musayev və qurumun rəsmisi Aslan Şahgəldiyev “Keşlə”nin medallarını klubun prezidenti Zaur Axundova təqdim ediblər.

Bazada baş tutan medalların təqdim etməsində futbolçulardan heç kim iştirak etməyib ki, bu da karantin dövrü ilə bağlıdır. Qadağaları pozmamaq üçün PFL medalları klubların bazasında rəhbər şəxslərdən birinə təqdim edir. Daha sonra isə klub tərəfindən medallar komanda üzvlərinə paylanacaq.

Qeyd edək ki, az sonra R.Musayev və A.Şahgəldiyev “Neftçi”nin bazasına da yollanaraq gümüş medalları klub rəhbərliyinə təqdim edəcəklər.