“... avqustda millimizin yeni baş məşqçisinin adı məlum olacaq”

Avqustda milli komandamızın yeni baş məşqçisinin adı məlum ola bilər.

Futbolxeber.az saytının məlumatına görə, bu haqda AFFA-nın birinci vitse-prezidenti Elxan Məmmədov açıqlama verib.

CBC Sportda canlı yayımlanan “Bizim futbol” proqramında qonaq olan E.Məmmədov yeni məşqçi təyinatının Millətlər Liqasının startından asılı olduğunu bildirib:

“Milli komandamız son oyununu ötən ilin noyabrında keçirib. Düşünürdük ki, martda yeni məşqçi təyinatı olacaq və Millətlər Liqasından öncə komandamız Maltada təlim-məşq toplanışı keçəcək, eləcə də Türkiyə ilə yoxlama oyunu keçirəcək. Amma bütün bunlar təxirə salındı. İndi vəziyyət elədir ki, Avropa futbolunda boş vaxt yoxdur. Çalışacağıq ki, Millətlər Liqası öncəsi yığmamız yeni məşqçinin rəhbərliyi altında heç olmasa 1 yoldaşlıq oyunu keçirsin. Hazırda məlumat belədir ki, Millətlər Liqası təşkil olunacaq, amma bir qədər gec start götürməsi də mümkündür. Bu, sırf mənim ehtimalımdır. Millimizin baş məşqçi təyintında bu məqam böyük rol oynayır. Əgər Millətlər Liqasının vaxtı dəyişməsə, artıq avqustda yeni baş məşqçinin adı məlum olacaq”.