“Çempionlar Liqası və Avropa Liqasında oynamaq üçün “Qarabağ”a keçdim”

“Qarabağ”ın sabiq qapıçısı Miro Varvodiç ölkəmizdəki karyerasını xayırlayıb.

Futbolxeber.az saytının məlumatına görə, hazırda Almaniyanın "Valdhof" klubunda forma geyən təcrübəli qolkiper Ağdam klubuna keçidini avrokuboklarda oynamaq istəyi ilə əlaqələndirib:

“Çempionlar Liqası və Avropa Liqasında oynamaq üçün “Qarabağ”a keçdim. İndi keçmişə baxanda düşünürəm ki, Avropada qalsaydım, daha yaxşı olardı. Çünki oradan ayrıldıqdan sonra əvvəlki səviyyəyə qayıtmağın çətin olduğunu gördüm".

31 yaşlı oyunçu Bakıda maraqlı insanlarla tanış olduğunu və özünə dostlar qazandığını bildirib: "Böyük liqalarda oynayanda xəyalınızı gerçəkləşdirirsiniz. Bu hissləri izah etmək çətindir. Oynayırsınız, məşq edirsiniz və səyahət edib zövq alırsınız. Mənə futbolla bağlı hər şey zövq verir".

Xorvatiyalı qapıçı ilk klubu "Hayduk"un onun üçün  xüsusi olduğunu və belə də qalacağını söyləyib: "Digər tərəfdən "Qarabağ" və "Köln" kimi klubların yaxşı şəraiti var. O komandalara keçəndə heç nə ilə maraqlanmaq lazım deyil, sadəcə futbolu düşünmək kifayətdir".

Qeyd edək ki, Miro Varvodiç 2012-2014-cü illərdə "Qarabağ"ın formasını geyinib.