AİJF “Neftçi” və “Keşlə”nin şikayətini haqlı saydı, bəyanat yaydı

Aprelin 30-da Azərbaycan İdman Jurnalistləri Federasiyası (AİJF) İdarə Heyətinin növbəti iclası keçirilib.

Futbolxeber.az saytının məlumatına görə, iclasın gündəliyindəki məsələlərdən biri “Neftçi” PFK-nın və “Keşlə” PFK-nın AİJF-yə müraciətlərinə baxılması olub. Belə ki, Etika Komissiyasının qeyd edilən məsələlərlə bağlı hesabatı dinlənilib. Klublardan daxil olan müraciətlərdə qeyd edilib ki, “Sportinfo.az” saytı “Neftçi” rəhbərliyi haqqında dəfələrlə etik qaydalara sığmayan, şər-böhtan xarakterli, “Keşlə”nin maliyyə fəaliyyəti haqqında isə həqiqətə uyğun olmayan məlumatlar yayır. AİJF tərəflərlə əlaqə saxlayaraq, onların kompromisə gəlmələrinə çalışsa da, sayt rəhbərliyinin məsələyə soyuq yanaşması səbəbindən nəticə əldə olunmayıb.

Sonra məsələ İdarə Heyəti üzvlərinin müzakirəsinə təqdim edilib və yekunda bununla bağlı federasiyanın bəyanat verməsi qərara alınıb. Bəyanatda qeyd olunub:

- Azərbaycan İdman Jurnalistləri Federasiyası olaraq, “Sportinfo.az” saytını Kütləvi İnformasiya Vasitələri Haqqında Azərbaycan Respublikasının Qanununun 10-cu və 44-cü maddələrinin tələblərinə riayət etməyə çağırırıq. Həmin maddələrin tələblərinə əsasən, mötəbər mənbə adı altında vətəndaşların şərəf və ləyaqətini alçaldan şayiələr, yalan və qərəzli yazılar dərc etmək, böhtan atmaq, yaxud digər qanunazidd əməllər törətmək məqsədi ilə kütləvi informasiya vasitələrindən istifadə olunmasına yol verilmir. Habelə, kütləvi informasiya vasitələrində fiziki və hüquqi şəxslərin şərəf və ləyaqətini ləkələyən böhtan və təhqir xarakterli məlumatlar verildikdə o, həqiqətə uyğun olmayan məlumatın təkzib olunmasını, düzəliş verilməsini, habelə üzr istənilməsini tələb edə, yaxud birbaşa məhkəməyə müraciət edə bilər.

AİJF “Sportinfo.az” saytının “Neftçi” PFK və “Keşlə” PFK ətrafında apardığı qarayaxma kampaniyalarını, klub rəhbərliyi və üzvlərini təhqir edən yazılar dərc etməsini qeyri-etik sayır və belə hallara son qoymağı tövsiyə edir.