"Qəbələ"nin legioneri: “Azərbaycanda virusa yoluxanlar çox deyil”

“Kanadada yaxşı mövsüm keçirdikdən sonra Azərbaycandan mənə zəng gəldi. İqnasio Errera və Nikolas Kanalesin meneceri məni bu ölkəyə gətirdi”.

Futbolxeber.az saytının məlumatına görə, bunu “Qəbələ”nin futbolçusu Rodriqo Qattas deyib.

29 yaşlı çilili hücumçu Azərbaycanda çıxış etməyin üstünlüklərindən söz açıb: “Bu, mənim üçün vacib addımdır. Çünki komandalar avrokuboklarda mübarizə aparır. Mövsümü birinci pillədə bitirən Çempionlar Liqasında çıxış edəcək”.

Hazırda Azərbaycanda olan forvard koronavirusa görə ölkədəki vəziyyətlə bağlı da danışıb: “1.5 ay əvvəl buraya gəldim, iki həftədir ki, futbol oynamırıq. Burada virusa yoluxanlar çox deyil, sadəcə tədbirlər görülür. Çəki almamaq üçün mən də tədbir görürəm. Adətən, insan evdə çox qalanda kökəlir”.