PFL “Sabah”ın məşqçisinin yalanını üzə çıxardı: “Heç bir kluba belə məlumat verilməyib”

"Sabah"ın ın məşqçisi Marko Lozo ölkəsinin "Sportklub" nəşrinə müsahibəsində dünən Azərbaycan Premyer Liqasının oyunlarının ən azı mayın sonuna qədər keçirilməyəcəyi ilə bağlı rəsmi məlumat aldıqlarını bildirib. Lakin Peşəkar Futbol Liqasının açıqladığı son rəsmi məlumatda çempionatda fasilənin aprelin 14-nə qədər olduğu bildirilmişdi.

Məsələyə aydınlıq gətirmək üçün PFL-in İnformasiya və İctimaiyyətlə Əlaqələr Departamentinin rəhbəri Aslan Şahgəldiyevə müraciət etdik. PFL rəsmisi Futbolxeber.az saytına açıqlamasında məsələyə belə aydınlıq gətirdi:

“14 mart-14 aprel tarixlərində ölkə ərazisində tətbiq olunan xüsusi rejimdir. Bununla əlaqədar olaraq, Azərbaycanda kütləvi idman tədbirlərinin keçirilməsinə də qadağa qoyulub. Nazirlər Kabinetinin yanında fəaliyyət göstərən Operativ Qərargahın göstərişini rəhbər tutaraq Azərbaycan Premyer Liqasının oyunları 14 aprel tarixinə qədər bərpa olunmayacaq. “Sabah”ın məşqçisinin nəyə əsasən belə açıqlama verdiyini bilmirəm. Amma PFL tərəfindən heç bir kluba mayın sonuna qədər oyunların keçirilməyəcəyi barədə məlumat verilməyib. Böyük ehtimalla, çempionatdakı fasilənin müddəti artırılacaq. Lakin hələ ki bu barədə hər hansı bir yenilik yoxdu. Bu, bizdən asılı olan məsələ deyil. Gənclər və İdman Nazirliyinin göstərişi ilə stadionlar qapadılıb. Ona görə də indiki halda çempionatın nə zaman bərpa olunacağı qeyri-müəyyəndir”.