28 May 2020, Cümə axşamı
“Qarabağ"da bosniyalı yarımmüdafiəçi?
“Qəbələ”dən ardıcıl 5-ci çempionluq
“Qarabağ” rekordçular arasında
Dmitri Nazarovdan növbəti qol

Ölkə futbolu

Futbolun özünə kömək edən lazımdı...

Hazırda bütün dünyada 1 nömrəli gündəm koronavirusdu. Çin özü pandemiyadan qurtulsa da, bütün dünya hələ də virusun əziyyətini çəkir. Günlər keçsə də, virusun qurbanlarının sayı azalmaq bilmir.

Ölkə rəhbərliyi vətəndaşlarımızın təhlükəsizliyini qorumaq üçün bütün lazımi addımları atsa da, virusun Azərbaycandan da yan keçmədiyi göz önündədi. Koronavirusun törətdiyi fəsadların təsirini azaltmaq üçün Prezident İlham Əliyevin 19 mart 2020-ci il tarixli fərmanı ilə xəstəliyin yayılmasının qarşısını almaq və onunla mübarizə istiqamətində həyata keçirilən tədbirlərə maliyyə dəstəyini təmin etmək üçün Koronavirusla Mübarizəyə Dəstək Fondu yaradılıb ki, fiziki və hüquqi şəxslər yardım məqsədi ilə fonda müəyyən məbləğdə ianə edirlər.

Geridə qalan 10 gün ərzində az sayda olsa da, idman cameəsinin nümayəndələri də fonda müəyyən məbləğdə vəsait köçürüblər. Təbii ki, bu baxımdan ilk öncə “Qarabağ”ın baş məşqçisi Qurban Qurbanov və Ağdam klubunun futbolçularının adları çəkilir. Qurbanov özü 20, futbolçuları isə 50 min manat məbləğində fonda ianə ediblər. Eləcə də “Neftçi”nin idman direktoru Ceyhun Sultanov fonda min manat məbləğində vəsait yatırıb.

Bu ianələrdən sonra AFFA və qurumun icraçı vitse-prezidenti Elxan Məmmədovun adı çəkilməyə başladı. Sosial şəbəkələrdə AFFA və Məmmədovun nə qədər ianə etməsi ilə bağlı suallar səslənməyə başladı. Hətta qurumu biganəlikdə qınayanlar da tapıldı. Lakin bu gün Futbolxeber.az saytının apardığı araşdırma nəticəsində məlum oldu ki, Elxan Məmmədov, eləcə də assosiasiyanın bəzi əməkdaşları Koronavirusla Mübarizəyə Dəstək Fonduna ianə ediblər. Lakin bunu ictimailəşdirməyi məqsədəuyğun hesab etməyiblər. Bu, məsələnin bir tərəfi.

Məsələnin digər tərəfi isə odur ki, AFFA-nın fonda ianə etməsi ümumiyyətlə düzgündürmü? Müəyyən vaxtlarda AFFA da xeyirxah əməllərindən qalmır. Körpələr, qocalar evləri ziyarət olunur, veteranların müxtəlif ehtiyacları qarşılanır və s. Bu baxımdan elə AFFA-nın bu yaxınlarda veteran futbolçu Səmədağa Şıxlarovun əməliyyat xərclərini qarşıladığını xatırlatmaq yerinə düşər.

Amma vəziyyətə real yanaşsaq, unutmaq olmaz ki, AFFA özü özünü dolandırmır. Assosiasiya sponsor gəlirləri hesabına dolanan təşkilatdı. Qurumun əsas sponsoru SOCAR-dı. Hazırda isə SOCAR-ın vəziyyətinin ideal olduğunu demək çətindir. Dünya bazarında neftin qiyməti günü gündən aşağı düşür. Bu vəziyyətin nə qədər davam edəcəyi məlum deyil. Kim təminat verə bilər ki, SOCAR neftin qiyməti bahalaşmayacağı təqdirdə, əvvəlki məbləği AFFA-ya ayıracaq? Şər deməsən, xeyir gəlməz, neftin qiyməti qalxmasa, bu gedişlə AFFA-nın özünə kömək edən lazım olacaq. Təkcə AFFA deyil, ölkəmizdə idmanla bağlı bir çox təşkilatlar özü özünü dolandıra bilmir. Elə bu səbəbdəndir ki, Koronavirusla Mübarizəyə Dəstək Fonduna ianə edənlərin siyahısına baxdıqda idmanla bağlı yalnız 3 təşkilatın adına rast gəlirik: Azərbaycan Gənclər və İdman Nazirliyi (30 150 AZN), Azərbaycan Gimnastika Federasiyası (20 000 AZN) və Azərbaycan Respublikası Milli Olimpiya Komitəsi (10 000 AZN).

Futbolxeber.az




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

May 2020
B.eÇ.aÇC.aCŞB
01 02 03
04 05 06 07 08 09 10
11 12 13 14 15 16 17
18 19 20 21 22 23 24
25 26 27 28 29 30 31