Tərlan Əhmədovdan qələbə şərhi

"Qələbə hər zaman xoş hisslər yaradır. Ardıcıl iki oyun məğlub olmuşduq. Bu gün istədiyim komandanı meydanda gördüm".

Futbolxeber.az saytının məlumatına görə, bu sözləri "Keşlə"nin baş məşqçisi Tərlan Əhmədov Premyer Liqanın 18-ci turunda "Zirə" ilə oyundan sonra mətbuat konfransında deyib.

4:0 hesablı darmadağını şərh edən təcrübəli mütəxəssis qarşıdakı oyunların daha çətin keçəcəyini bildirib: "Bu əzmkarlıq və istəyin davamını gətirməliyik. İki məğlubiyyətdən sonra kollektivi motivasiya etmək çox çətindir. Futbolçuları qələbə münasibətilə təbrik edirəm. Daha çətin oyunlarımız olacaq. Bu qarşılaşmanı unutmalıyıq".

Əhmədov komandanın bombardiri Lorenzo Frutosun oynamamasının səbəbini də açıqlayıb: "Neftçi" ilə oyundan sonra tempraturu qalxmışdı. Frutos bir neçə məşqləri buraxdı. Hələ ki, tam formasında deyil. Rəqibin müdafiəsinə görə Aleksandr Kristovaoya şans verdik".