Rövnəq Abdullayev: “Millimiz zəiflər arasında qazandığı şansı dəyərləndirə bilmədi”

“Ölkəmiz beynəlxalq səviyyəli turnirlərə yüksək səviyyədə ev sahibliyi etsə də, təəssüf ki, millimiz uğurlu çıxışı ilə bizi sevindirə bilmədi”.

Futbolxeber.az saytının məlumatına görə, bu sözləri AFFA prezidenti Rövnəq Abdullayev bu dəqiqələrdə keçirilən assosiasiyanın növbəti Konfransında çıxışı zamanı deyib.

O, yığmamızın Millətlər Liqasında qazandığı real şansı dəyərləndirə bilmədiyini təəssüflə xatırlayıb: “Millət Liqasında yığmamız ümidləri doğrultmadı. Təəssüf ki, millimiz zəiflər arasında qazandığı şansı dəyərləndirə bilmədi. Halbuki Millət Liqasından komandamızın 4 oyununa Bakının da ev sahibliyi edəcəyi Avro-2020-yə vəsiqə qazanacağına ümid edirdik. Seçmə mərhələdə də millimiz cəmi 1 xal qazana bildi. Milli komandamızdan fərqli olaraq, klublarımız Avrokuboklarda inamlı çıxışla bizləri sevindirirlər. Xüsusən bu baxımdan ardıcıl 6 il qrup mərhələsində çıxış edən “Qarabağ”ın adını çəkmək olar”.