28 Mart 2024, Cümə axşamı
Ağabala Ramazanov qayıtdı - FOTO
"Zirə"dən ardıcıl 15-ci qələbə
“Səbail”in hücumçusu: 1 qol, 2 qələbə
U-21 millimiz Ukraynaya da uduzdu

Ölkə futbolu

Füzuli Məmmədov? Bacarmalıdı!

Premyer Liqa klublarımızın təxminən 15 günlük Antalya macərası başa çatdı. Artıq bu həftə sonu kimin qış fasiləsindən necə yararlandığına canlı şahidlik edəcəyik. Düzdür, fasilədən sonra hansısa komandanın ilk tura 100 faiz hazır olduğunu iddia etmək düzgün olmazdı. Amma hər halda artıq fevralın ilk 2 günündə müəyyən təsəvvürlər formalaşacaq.

Əsas diqqətlər “Neftçi”yə yönələcək. Ona görə yox ki, “ağ-qaralar” ölkə futbolunun flaqmanıdı, yaxud bu gün “Qarabağ”a çempionluq yolunda maneə törədə biləcək yeganə rəqibdir (Hazırda “Neftçi”dən cəmi 2 xal geri qalan “Keşlə”ni kiçiltmək fikrindən uzağam. Amma reallıq budur ki, hər nə qədər mübariz kollektiv formalaşdırsa da, Tərlan Əhmədovun komandası üçün bu gün bürünc medal da uğur sayılacaq). Əsas məsələ odur ki, “Neftçi” artıq yoluna Roberto Bordinsiz davam edir. Qış fasiləsində baş məşqçi vəzifəsində italiyalı mütəxəssisi köməkçisi Füzuli Məmmədov əvəzlədi. Gənc məşqçinin təyinatı heç də birmənalı qarşılanmadı. Hətta bunu “Neftçi” rəhbərliyinin cari mövsümdən əlini üzməsi kimi dəyərləndirənlər də oldu. Hər kəsin fikrinə hörmətlə yanaşsam da, qətiyyən bu deyilənlərlə razı deyiləm.

Əksinə, “Neftçi” rəhbərliyinin düzgün addım atıb. Birincisi, ona görə ki, Füzuli Məmmədov bunadək də “ağ-qaralar”ın məşqçilər korpusunda yer alırdı və koamandanı kənardan gələ biləcək istənilən məşqçidən daha yaxşı tanıyır, kimin qabında nə olduğunu bilir.

İkincisi, Füzuli Məmmədov gəncdir, özünü göstərmək üçün alışıb yanır. Xatırlayıram, bir neçə ilə əvvəl Füzuli Məmmədov “İnter”in (o zaman komanda hələ “Keşlə” adlandırılmırdı) əvəzedicilərini çalışdırdığı vaxt hansısa oyunlarını izləmişdim. 90 dəqiqə boyunca yerində dayan bilməyən Məmmədov sanki özü də meydanda mübarizə aparırdı. Futbolçu kimi döyüşkən, meydanın hər qarışı uğrunda mübarizə aparan Məmmədov indi məşqçi kimi eyni uğurları qazanmaq arzusundadır.

Düzdür, buna qədər əsas komandada baş məşqçi kimi çalışmaması onun əleyhinə ola bilər. Amma Məmmədov karyerası ərzində bir çox təcrübəli məşqçi ilə çalışıb və şübhəsiz, hər birindən nəsə götürüb.

Digər tərəfdən də ortada Füzuli Məmmədovla eyni nəsildən olan Elmar Baxşıyev nümunəsi var. Sənan Qurbanovun istefasından sonra “Qəbələ” rəhbərliyinin müvəqqəti olaraq komandanı tapşırdığı Baxşıyev geridə qalan müddətdə işinin öhdəsindən lazımınca gəldi. Niyə də eyni uğuru Füzuli Məmmədov təkrarlamasın?

Və nəhayət, bu gün ölkənin bir nömrəli yerli məşqçisi hesab olunan Qurban Qurbanov “Neftçi”yə baş məşqçi təyin olunanda çoxmu təcrübəliydi? Lakin rəhbərlik ona güvəndi və bu gün “Qarabağ”a uğurlar qazandıran Qurbanov beləcə məşqçi karyerasında ilk addımları atdı...

Odur ki, Füzuli Məmmədova da dəstək olmaq lazımdı. Gerisi artıq onun öhdəsinə düşür. Verilən şansdan yararlanıb-yararlanmaması Məmmədovun özündən asılıdır.

İBRAHİM   




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Mart 2024
B.eÇ.aÇC.aCŞB
01 02 03
04 05 06 07 08 09 10
11 12 13 14 15 16 17
18 19 20 21 22 23 24
25 26 27 28 29 30 31