Rizvan Fərzəliyev: “Mərhələ adlayacağımıza inanıram”

“İlk oyunda meydan sahibi komanda ilə qarşılaşacağıq. Bir tərəfdən yaxşıdır, əsas rəqibimizlə üz-üzə gələcəyik, amma meydan sahibi olmaları, heyətlərində keyfiyyətli futzalçıların olması bizim üçün yaxşı məqam deyil".

Futbolxeber.az saytının məlumatına görə, bu sözləri futzal millimizin kapitanı Rizvan Fərzəliyev bu gün keçirdiyi brifinqdə deyib.

Təcrübəli futzalçı dünya çempionatının elit-raund mərhələsindəki şanslarını dəyərləndirib: "Uğurlu nəticə qazanmaq üçün əlimizdən gələni edəcəyik. Təbii ki, məqsədimiz final mərhələsinə yüksəlməkdir. Deməzdim ki, Rusiya millisi aşkar favoritdir. Rusiya yığması ilə yaxın keçmişdə turnirlərdə üz-üzə gəlmişik. Bizdən heç də aşkar üstün deyildirlər. Razıyam, təcrübəli komandadır, dəfələrlə Avropa, dünya çempionatlarının finalında iştirak edib. İstənilən hər bir komandanın şansı bərabərdir. Komandamıza güvənirəm və mərhələ adlayacağımıza inanıram”.