“Qəbələ” - “Zirə”: 18-ci duel

“Zirə” bu həftə Azərbaycan Premyer Liqasında növbəti oyununu keçirəcək.

Futbolxeber.az saytının məlumatına görə, paytaxt klubu XIII turda “Qəbələ” ilə qarşılaşacaq. Noyabrın 30-dakı görüş Qəbələ şəhər stadionunda baş tutacaq.

Bu, “Zirə”nin mövsümün ilk yarısında çempionatdakı son səfər sınağı olacaq.

Qəbələdəki matç iki komanda arasında 18-ci duel kimi tarixə düşəcək. İndiyədək Premyer Liqada 17 dəfə yolları kəsişən rəqiblərin matçlarında daha çox heç-heçə qeydə alınıb. 8 dəfə sülhlə ayrılan komandaların oyunlarında “Zirə” 4, “Qəbələ” 5 dəfə qalib gəlib. 15 qol vuran Bakı təmsilçisi öz qapısından 19 top buraxıb.

Son üç qarşılaşmada meydanı qolsuz tərk etməyən “Qartallar”ın 11 futbolçusu “Qəbələ”nin qapısına yol tapıb. Onlardan dördü daha çox - hərəyə 2 dəfə fərqlənib. Bunlar Sadio Tounkara, Nelson Bonilya, Viktor İqbekoyi və Milan Duriçdir.

“Zirə” 9-cu dəfə Qəbələnin eyniadlı komandasının qonağı olacaq. Səfərdə 1 qələbəsi olan paytaxt klubu 5 dəfə səfərdən bir xalla dönüb. 3 görüşdə xalsız qalan komanda 6 qol vurub, 8-ni buraxıb.

Qeyd edək ki, noyabrın 30-da keçiriləcək “Qəbələ” - “Zirə” matçı saat 15:00-da başlayacaq.