"Qarabağ"ı Qarabağa görə yox...

Günlərdir gözlədiyimiz oyun dünən baş tutdu. Amma təəssüf ki, nəticə gözlədiyimiz kimi alınmadı. Yəqin, razılaşarsız ki qəlbimizin dərinliyində çoxumuz "Ayntraxt"ın güclü olduğunu bilirdik. Lakin yenə də "Qarabağ"a inanırdıq. Çünki "Qarabağ" bizi daim qələbələrə öyrəşdirib. "Rusenborq", "Visla" kimi komandalar da püşkdən sonra favorit göstərilirdilər. Gəl ki, yekunda "Qarabağ" bizi sevincə boğdu. Təəssüf ki, bu dəfə təəssüfləndik. Uduzduğumuza görə yox, rəqibin "Ayntraxt" olduğuna görə. Amma yenə də bu yenilgiyə görə kimisə günahlandırmaq düzgün deyil. İndi bəziləri "Qurbanov Leroy Corcu dəyişməliydi, Muarrem o topu vurmalıydı" və s. və i.a. kimi fərziyələr irəli sürürlər. Buna baxmayaraq, dünənki məğlubiyyətə görə kimisə günahlandırmaq yersizdi. Sadəcə, səviyyə fərqi öz sözünü dedi. Vəssəlam.

Oyundan sonra sosial şəbəkələrin birində oxuduğum bəzi fikirlər məni bu yazını yazmağa vadar etdi. Qətiyyən razılaşmadığım fikir "Avrokuboklarda "Qarabağ" "Neftçi"nin kölgəsində qalıb"dı. Bununla razılaşmaq doğurdan da mümkün deyil. Çünki "Neftçi" bizi yalnız ötən il sevindiribsə, Ağdam klubu son illər sevinc mənbəyimizə çevrilib. Ötən il "Neftçi" tarix yazdı. Bunu hamımız dərk və qəbul edirik. "Neftçi"nin sevincinə görə hamımız sevindik və fəxr etdik. Gəl ki, həmin vaxt əksər mütəxəssislər də bildirdilər ki, "Neftçi"nin uğurunun təsadüf, yoxsa qanunauyğunluq olduğu gələn il bəlli olacaq. Əgər, "Neftçi" ardıcıl ikinci il bu uğuru təkrarlasa, deməli komanda həqiqətən də bu uğura layiqdi. Təəssüflər olsun ki, builki nəticələr "Neftçi"nin uğurunun təsadüf olduğunu göstərdi. Çünki komanda bir il qrupa düşüb, növbəti ildə elə ilk mərhələdəcə mübarizəni dayandırırsa, deməli ötənilki uğur təsadüf olub. Amma "Qarabağ"ın çıxışına təsadüf adını yapışdırmaq ən azından günah olar. Komanda son 5 il, avrokuboklarda iştirak etdiyi 4 il ərzində isə 3 dəfə play-offa adlayıb, bir dəfə isə üçüncü mərhələdə "Brügge" kimi güclü rəqibə uduzubsa, buna necə təsadüf demək olar? Axı, bu, insafsızlıq olar?  Odur ki, cənabla, gəlin özümüzü aldatmayaq.

Başqa bir məqama da toxunmaq istəyirəm. "Qarabağ"dan söhbət düşən kimi bəziləri deyir ki, "Qarabağ" Ağdamındı, köçkün komandadır və s. Məhz bu məqama görə çoxları "Qarabağ"a simpatiya bəsləyir. Bu fikir isə başdan-ayağa cəfəngiyatdır. Birincisi, gəlin özümüzü aldatmayaq, saxta patriotluq nümayiş etdirməyə ehtiyac yoxdur. "Qarabağ"a köçkün komandadır deyə, minnət qoymaq lazım deyil. Əgər, itirilmiş torpaqlarımızın komandasına belə hörmət qoyanıqsa, nəyə görə illərdi birinci divizionda gün keçirən "Şuşa"ya yaxın duran tapılmır? Ağdam bizimdi, Şuşa yox? Yoxsa, bəlkə xəbərimiz yoxdur, Ağdamı işğal ediblər, Şuşanı yox? Köçkün komandaları belə sevəniksə, elə "Şuşa"ya da dayaq duraq da, niyə durumuruq? Odur ki, "Qarabağ" yaralı yerimiz olduğuna görə sevilir" fikrini dağıtmaq lazımdır. "Qarabağ" "Qarabağ" olduğuna görə sevilir. "Qarabağ" Qurban Qurbanova görə sevilir. "Qarabağ" sərgilədiyi oyuna görə sevilir. "Qarabağ" Avropada adından söz etdirdiyinə görə sevilir.

ELMAN