Azərbaycan millisi - gələcəyin komandasını qurmaq mümkündü (QEYD)

AVRO-2020-nin seçmə mərhələsinə uğursuz start verən milli komandamız son 2 görüşdə cəmi 1 xal qazansa da, gələcəyə ümid verdi. Söhbət təkcə göstərilən oyundan getmir. Məşqçilər Komitəsinin sədri, təcrübəli mütəxəssis Vaqif Sadıqovun da qeyd etdiyi kimi, yığmamızın Xorvatiya ilə oyunu təkcə dünya çempionatının finalçısı ilə heç-heçə etməyimizlə yadda qalmadı. Həm də meydandakı gənclərin inamlı çıxışı gələcəyə nikbin baxmağa əsas verdi. Hazırda milli komandamızın heyətində son illərdə olmadığı qədər gənc futbolçunun yer alması gələcəyə olan ümidlərimizi artırır.

Millimizin Xorvatiyaya qarşı start heyətinə diqqət edək. Heyətdə ən yaşlı futbolçular 31 yaşlı Pavel Paşayev və Cavid Hüseynov idi. İlk “11-lik”də yer alanlardan Şəhriyar Rəhimovla Maksim Medvedevin 30, Dmitri Nazarovun isə 29 yaşı var. Qara Qarayevdən sonra (27 yaş) yerdə qalan 5 nəfər arasında ən yaşlısı yığmada debüt matçında adından söz etdirən 25 yaşlı Emil Balayevdir. Ramil Şeydayevin 23, Bəhlul Mustafazadə və Mahir Emrelinin 22, Anton Krivotsyukun isə cəmi 21 yaşı var. Xorvatiya ilə oyunda yığmamızın orta yaş həddi 25,5 olub.

Xorvatlarla görüşdə ehtiyat oyunçular skamyasında qalan futbolçulardan ən qocası 30 yaşlı Riçard Almeyda, ən gənci isə 19 yaşlı Renat Dadaşovdur.

İkinci hissədə forma geymək şansı qazananlardan - millimizin bərabərlik qoluna imza atan Təmkin Xəlilzadənin, eləcə də Rəşad Eyyubovun 26, Emin Mahmudovun isə 27 yaşı var.

Yaşı 29 və daha artıq olanları çıxsaq, görmək olar ki, hazırda yığmaya cəlb olunanlardan Emil Balayev (25), Bəhlul Mustafazadə (22), Anton Krivotsyuk (21), Mahir Emreli (22), Ramil Şeydayev (23), Şahruddin Məhəmmədəliyev (25), Araz Abdullayev (27), Emin Mahmudov (27), Ağabala Ramazanov (26), Ömər Buludov (21), Renat Dadaşov (19), Təmkin Xəlilzadə (26) ən azı qarşıdakı 5, elələri var minimum 10 ildə də milliyə kömək edə bilərlər.

Təbii ki, hazırda Premyer Liqada forma geyən və yığmaya potensial namizədləri də unutmaq olmaz. Bu baxımdan, yaş həddini 29-a kimi götürsək, Rahil Məmmədov (24 yaş), Abbas Hüseynov (24 yaş), Bədavi Hüseynov (28 yaş), Rəhman Hacıyev (26 yaş), Namiq Ələsgərov (24 yaş), Fəhmin Muradbəyli (23 yaş), Mirabdulla Abbasov (24 yaş), Yusif Nəbiyev (22 yaş), Roman Hüseynov (22 yaş), Qismət Alıyev (23 yaş), Ülvi İsgəndərov (22 yaş), Elvin Camalov (24 yaş), Taşkın Sertan (22 yaş), Elgün Nəbiyev (23 yaş), Ehtiram Şahverdiyev (23 yaş), Xəyal Nəcəfov (22 yaş), Amil Yunanov (26 yaş), Məqsəd İsayev (25 yaş), Özüncan Kökcü (21 yaş), Coşqun Diniyev (24 yaş), Azər Salahlı (25 yaş), Ziya Əzizov (21 yaş) və digərlərini nümunə göstərmək olar.

Həmçinin, bu gün 21 yaşadək futbolçulardan ibarət yığmamız da perspektivli futbolçular mövcuddur. Bu gün U-21-in aparıcı üzv olan  və son görüşlərdə özlərini yaxşı tərəfdən göstərən Amin Seydiyev, Turan Manafov, Hacıağa Hacıyev, Fərid Nəbiyev, İsmayıl İbrahimli, Şakir Seyidov, Hüseyin Seyliqli, Barış Ekincier və digərlərinin adlarını çəkmək mümkündür.

Göründüyü kimi, siyahıda yaşı 28-dən aşağı olan və yaxın gələcəkdə potensial yığma üzv hesab edilən 40-dan artıq futbolçu var.

Məlum məsələdir ki, maksimum 28 yaş həddini nisbi olaraq götürmüşük. Çünki hansısa futbolçu 33, 34 yaşında belə meydana çıxıb, komandasına fayda verə bilər. Yaxud bu gün 29 yaşı olan Nazarov ən azı qarşıdakı 2-3 ildə də millimizə fayda verəcək səviyyədə çıxış edir.

Göründüyü kimi, bu gün bəlkə də son illərdə ilk dəfədir ki, yığmamızın start heyətində, ehtiyat oyunçular skamyasında, U-21 yığmasında, eləcə də Premyer Liqa klublarında milliyə köməyi dəyə biləcək 21, 23, 25 yaşlı kifayət qədər oyunçu var. İndi qalır yalnız həmin futbolçuların inkişafı və vahid komanda şəklində uğur qazanmaq. İnanaq ki, bu gənclər daha da inkişaf edəcək və yaxın gələcəkdə millimizə uğur qazandıra biləcəklər.