“Qəbələ” və “Qarabağ”ın qisasını millimizdən aldı

Dünən 21 yaşadək futbolçulardan ibarət milli komandamız Avropa çempionatının seçmə mərhələsi çərçivəsində Bakıda gürcüstanlı həmyaşıdları ilə qarşılaşıb.

Futbolxeber.az saytının məlumatına görə, bu, rəqibin çalışdırıcısı Giorgi Tsetsadzenin son 4 ildə Bakıya rəqib qismində 3-cü səfəri idi.

Daha əvvəl Gürcüstanın “Samtredia” klubunu çalışdıran Tsetsadze 2016-cı ildə Avroliqanın I təsnifat mərhələsində “Qəbələ”yə rəqib olmuşdu. İyunun 30-da “Bakcell Arena”da keçirilən həmin matç “Qəbələ”nin 5:1 hesablı qələbəsi ilə tamamlanmışdı.

Növbəti mövsüm Tsetsadzenin çalışdırdığı “Samtredia” Çempionlar Liqasında “Qarabağ”a rəqib olur. 2017-ci il iyulun 11-də II təsnifat mərhələsinin ilk oyunu çərçivəsində Tofiq Bəhramov adına Respublika stadionunda keçirilən matç çempionumuzun 5:0 hesablı qələbəsi ilə yekunlaşır.

Bu dəfə Gürcüstan 21 yaşadək futbolçulardan ibarət millisinin baş məşqçisi qismində paytaxtımız təşrif buyuran Giorgi Tsetsadze üçüncü cəhddə Bakıdan qələbə ilə ayrılmağı bacarır. Onun komandası U-21 millimizə 3:0 hesabı ilə qalib gəlir.