23 Noyabr 2019, Şənbə
“Qarabağ” "Sumqayıt"a uduzu
XIII turun oyun cədvəli açıqland
Etopaz əmsalları yüksəltdi
Milli üzvü “Qarabağ”ı tərk edəcək

Ölkə futbolu

Pusquda dayananları sevindirmə, milli! (QEYD)

Rəhmətlik Böyükağa Hacıyev təkcə “Neftçi”ni Avroliqanın qrup mərhələsinə yüksəldib, adını Azərbaycan futbolu tarixinə qızıl hərflərlə yazdırmadı. Mərhum mütəxəssis həm də rəqiblərə meydan oxuması, bəzən publikaya işləməsi, azarkeşləri, hətta medianı da coşdurması ilə də seçilirdi. Böyükağa Hacıyevin ən müsbət xüsusiyyətlərindən biri sözü üzə deməsi idi.

Bilmirəm, “CBC Sport”un tanınmış şərhçisi, dəyərli həmkarımız Pərviz Musayev xatırlayar, ya yox, illər öncə Moldovadaydıq. “Bakı” həmin günü İntertoto kubokunda I təsnifat mərhələsinin cavab oyunu çərçivəsində “Daçiya”nın qonağı olacaqdı.

Danışıram sizə 2007-ci ilin yayından. 12 il əvvəl - o vaxt Azərbaycan klubları üçün avrokuboklarda qrup mərhələsinə yüksəlmək yuxu idi. O illərdə 1 mərhələ adlamağı bayram edirdik. Təsadüfi deyil ki, “Bakı”ya qədər digər 3 klubumuz 2 gün ərzində qitə kuboklarında mübarizəni dayandırmışdı.

Oyun günü səhər saatlarında komandamızın qaldığı “Daçiya” otelinin qarşısında Pərviz rəhmətlik Böyükağa müəllimə, “Bütün ümidlər sizədi. “Bakı” da mübarizəni dayandırsa, ciddi tənqidlə üzləşəcəksiniz” dedi. Böyükağa Hacıyevin cavabı özünü çox gözlətmədi: “Bilirəm. Sifarişlər artıq verilib, yazılar hazırdı. Bircə hakimin final fitini gözləyirlər ki, “Bakı”nın uduzması rəsmiləşsin. Göstərişlər hələ Bakıdan çıxmamışdan əvvəl verilib”.

Milli ilə bağlı yazıya Böyükağa Hacıyevdən bu qədər geniş giriş verməyim sizləri çaşdırmasın. Bu gün (ümumiyyətlə, son zamanlar) baş verənləri gördükdə məhz rəhmətlik Böyükağa Hacıyevin həmin sözləri yadıma düşür. Oxuyub, inciyənlər də olacaq, bilirəm. Amma reallıq budur.

Bu gün milli komandamız Avropa çempionatının seçmə mərhələsində növbəti oyununa çıxacaq. Təəssüf ki, indi elə məqam yaranıb ki, millinin uğurunu istəyənlərin sayı sanki uduzmasını arzulayanlardan daha azdı. Ölkənin adı, dövlətin bayrağı, gerbi qalıb bir kənarda, şəxsi mənafelər hər şeydən üstün tutulur.

AFFA-da idarəçiliyi ələ keçirmək istəyənlər, Elxan Məmmədovun istefasını arzulayanlar, Qurban Qurbanovun yığmadan uzaqlaşdırılmasını düzgün saymayanlar... daha neçə qruplaşma var futbolumuzda, bilmirəm. Amma bildiyim odur ki, bu gün milli uduzsa, yenə də tənqid atəşinə tutulacaq. Təbii ki, uduzan komandanı heç kim tərifləməməlidir. Sadəcə yazını oxuyanda 3 cümlədən sonra bilirsən ki, sifarişlidi, məqsədlidi, təmənnalıdı, ya yox. Və təəssüf ki, millinin hər uğursuz oyunundan sonra təmənnalı tənqidlərin sayı haqlı tənqidlərdən daha çox olur...

Bu gün meydana çıxacaq Azərbaycan millisidir. Bu milli nə Rövnəq Abdullayevindir, nə Elxan Məmmədovun, nə Nikola Yurçeviçin, nə də digərlərinin. Bu milli ölkəni təmsil edir, Azərbaycanı. Azərbaycan isə hər birimizin həyatındakı əbədi sevgilərdən biri, vətənimizdir.

Məlum məsələdir, Uels bizdən daha güclüdü, rəqibin futbolçularının əksəri 8 komandalı yox, 20 komandalı, Azərbaycan deyil, İngiltərə Premyer Liqasında çıxış edir. Reallıq budur ki, bu gün yığmamızın Kardifdə uduzmaq ehtimalı, xal qazanmaq ehtimalından daha çoxdur. Amma yenə də inanmaq lazımdı. İnanaq ki, milli bu gün çətin səfərdə ən azı 1 xal da olsa, qazanacaq. Ən azı pusquda dayananları sevindirmə, milli! Uduzsan belə, mübarizə apar, sona qədər vuruş. Məğlub olsaq belə, yığmamızın özündən güclü rəqib qarşısında vuruşmasını görən azarkeş 3 gün sonra Xorvatiya ilə oyunda “Bakcell Arena”nı dolduracaq. Uğurlar, milli!

İBRAHİM




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Noyabr 2019
B.eÇ.aÇC.aCŞB
01 02 03
04 05 06 07 08 09 10
11 12 13 14 15 16 17
18 19 20 21 22 23 24
25 26 27 28 29 30