Alban Hoca: "Qarabağ" daha üstündü"

"Komandamız “Qarabağ”la oyuna hazırdı. Üç həftədi yeni mövsümə hazırlaşırıq".

 

Futbolxeber.az saytının məlumatına görə, bu sözləri "Partizani”nin kapitanı Alban Hoca Çempionlar Liqasının 1-ci təsnifat mərhələsində bu gün "Qarabağ"la keçiriləcək oyun haqda deyib.

 

32 yaşlı qapıçı Ağdam klubu haqda ehtiyatlı danışıb. O, indiyə qədər belə güclü rəqiblə qarşılaşmadıqlarını bildirib: “Yaxşı komandamız var. Rəqiblə başabaş mübarizə aparmağa çalışacağıq. Ev oyununda yaxşı nəticə qazanacağımıza ümid edirəm. Çempionlar Liqasında bütün komandalar güclüdür. Amma “Qarabağ” indiyədək qarşılaşdığımız komandalardan daha üstündü. Bu qrafiklə yayda oynamaq çətindi. Amma mübarizə aparmalıyıq. Yaxşı ki, oyun günü  havanın nisbətən sərin olacağı proqnozlaşdırılır. İsti havada maksimum qüvvə sərf etmək olmur. Görüşün şam yeməyindən sonra keçirilməsi yaxşı olardı. Son vaxtlar çox qol buraxmağımız oynadığımız oyuna görə deyil. Bir az diqqətsizliyin acısını çəkirik. Bunu aradan qaldıracağıq". 

 

"Rəqibi məşqçimiz təhlil edərək bizə güclü və zəif tərəflərini deyib" - deyə, Alban Hoca fikirlərini yekunlaşdırıb.