"Əzmkar olsaq, Slovakiyaya uduzmarıq"

Azərbaycan milli komandasının sabiq hücumçularından olan Nadir Nəbiyev yığmamızın çıxışını dəyərləndirib.

 

Futbolxeber.az saytına açıqlama verən Nəbiyev, yığmamızın Macarıstana qarşı çıxışını və Slovakiya ilə oyun barədə gözləntilərini açıqlayıb: "Desəm ki, Macarıstanla oyunda qələbə gözləyirdim, düzgün olmaz. Fikirləşirdim ki, məğlub olmaya bilərik. Millinin oyununda əzmkarlıq görünmədi. İkinci hissədə bir az sürətli oynadıq, həm qol vurduq, həm də rəqibi müəyyən qədər geri çəkilməyə məcbur etdik. Müdafiədə buraxılan ani səhvdən istifadə edən rəqib rahat qələbə qazandı.Slovakiya kifayət qədər güclü rəqibdi. Sabah bizim üçün çətin olacaq. Mən yenə də fikirləşirəm ki, meydançada əzmkar olsaq Slovakiyaya məğlub olmarıq".

 

Millimizin sabiq hücumçusunun fikrincə, Slovakiya ilə oyuna da Nikola Yurçeviç meydana eyni heyəti buraxmayacaq: "Böyük ehtimalla Nikola Yurçeviç Slovakiya ilə oyun üçün əsas heyətdə dəyişiklik edəcək. Macarıstanla oyunda onu göstərdi ki, dəyişiklik lazımdı. Məncə, millinin oyununa təsir edən bir neçə amillər var. Çempionatımızda 8 komanda var, legioner futbolçularımız azdı. Bunlar da yığmamızın çıxışına təsir edən məsələlərdi".

 

Nadir Nəbiyev qrupdakı artıq iki oyundan məğlub ayrılan Azərbaycan millisinin qrupda xal yığmaq ehtimalının nə dərəcədə real olub-olmadığını dəyərləndirib: "Məğlub olduğumuz komandalar da kifayət qədər güclü idilər. Rəqiblərimiz həm ustalıq, həm təcrübə baxımından bizdən üstün idilər. Ona görə də bütün oyunlarda rəqibdən asılı olmayaraq ancaq əzmkarlıqla xal ala bilərik. Necə ki gec deyil, uşaq futboluna diqqət ayırmaq lazımdı. Çünki yetişən uşaqlar olmasa belə də davam edəcək".