19 Mart 2024, Çərşənbə axşamı
“Ağ-qaralar”ın “Black Friday”i
"Qarabağ" və "Sabah" qalib gəldi
Orxan Əliyev: “Heyif o epizodlardan...”
Sxadadze: “Təzyiq böyükdür”

Ölkə futbolu

Sənan Qurbanov: “Komandanın yanındadır və dəstəyini hiss edirik”

"Qəbələ" klubunun baş məşqçisi Sənan Qurbanovun müsahibəsi

- Premyer Liqada ardıcıl iki oyunda qalib gəldiniz. Aprelin 23-də isə Azərbaycan Kubokunun yarımfinalında "Qarabağ"la qarşılaşacaqsınız. "Keşlə" və "Zirə" üzərində qələbələr sizə əlavə motivasiya ola bilərmi?

- Futbolçular hər zaman eyni tapşırığı yerinə yetirməyə çalışırlar. Bəzən alınsa da, hərdən elə olur ki, alınmır. Son oyunlarda da çalışaraq, tapşırıqların öhdəsindən gəldilər. Uşaqlar həmişəki kimi işə daha məsuliyyətli yanaşdılar və qələbələr qazandıq. Bunlar bizə çempionatda çox vacib idi. Qarşıda kubok oyunlarımız olacaq. Burada da iddialıyıq. Çalışacaq ki, bacardığımız qədər hər iki "cəbhə"də mübarizə aparaq. Buna görə də son qələbələr bizə yaxşı təsir etməlidir. Uşaqlar "Zirə" ilə oyunda meydanda çox qaçdılar. Çalışdıq ki, bu dönəmi daha çox bərpa prosesinə ayıraq. Oyunçular verilən tapşırıqları maksimum yerinə yetirdilər.

- Kubokda ilk oyunu doğma meydanda keçirəcəksiniz. "Qarabağ"ı mübarizədən kənarlaşdırmaq üçün sabah sizə hansı nəticə sərf edə bilər?

- "Qarabağ"ın çox ciddi rəqib olduğunu bilirik. Rəqibin öz oyun üslubü var. Bu, o demək deyil ki, əllərimizi yanımıza salmalıyıq. Biz də meydana çıxıb mübarizə aparmalı və qələbə qazanacağımıza inanmalıyıq. Futbolçulara bunu aşılamaq istəyirik. Baxmayaraq ki, çempionatın bütün matçların rəqibimizə məğlub olmuşuq. Amma kubok tamam fərqlidir, iki oyundan ibarətdir. Çalışacağıq ki, həm hücumda, həm də müdafiədə daha diqqətli olaq. Birinci matçda hansı nəticə olsa, cavab oyununda ona uyğun addım atacağıq. İlk görüşdə qapımızdan qol buraxmaq və məğlub olmaq istəmirik.

- Qapıçı Dmitri Bezotosnının zədə üzündən yoxluğunu "Qəbələ" üçün ciddi itki hesab etmək olar?

- Bezotosnı əsas oyunçularımızdan biridir. Onun olmaması bizim üçün itkidir. Amma nəzərə almalıyıq ki, hər zaman Anar Nəzirova birinci qapıçı gözü ilə baxmışıq. Məşqlərə yanaşması, kollektivə münasibəti mükəmməldir. Bu, futbolçulara da, onun özünə də yaxşı təsir edir. Qapıda Anarın olması bizim üçün heç bir narahatlıq doğurmur. Mənə elə gəlir ki, Bezotosnının yoxluğunu hiss etməməliyik.

- Bu mövsüm Premyer Liqadakı bütün oyunlarda "Qarabağ"a məğlub olduğunuzu vurğuladınız. Yəqin ki, həmin matçları analiz etmisiniz. Bu komandanı, nəhayət, məğlub etməyin yollarını tapmısınızmı?

- Əvvəlki qarşılaşmaları analiz etmişik. Rəqibin heyətində həm komanda, həm də fərdi şəkildə yaxşı futbolçular var. "Qarabağ"a qarşı taktiki cəhətdən çox düzgün oynamalıyıq. Birinci, ikinci və üçüncü zonaların hamısında, sağ və sol cinahlarda təşəbbüsü ələ almalıyıq. Bütün bunları futbolçulara bildiririk. "Qarabağ"a qarşı ilk dövrədəki oyunu çıxmaq şərtilə digər üç matçda mükəmməl oynamışıq. Hardasa konsentrasiya boşluğu və sadə bir səhv nəticəsində qapımızda ikinci qolu görmüşük. Ona görə məğlub olmuşuq. Taktiki cəhətdən də düzgün oynamışdıq. Yenə dəyişən bir şey olmayacaq. İndi də doğru və düzgün oynamaq istəyirik. Sadacə, o boşluğu buraxmasaq, qapımızda qol görməyəcəyik. Əlimizə düşən şanslardan da istifadə etməliyik.

- Premyer Liqada olduğu kimi, kubokda da Avropa Liqası şansı davam edir. Sizin üçün hansını nisbətən daha asan hesab etmək olar?

- Finala vəsiqə qazanmağı da nəzərə alsaq, üç oyun kubokda, üç oyun isə çempionatda qalıb. Ona görə elə bir dönəmdir ki, hansısa birini seçə bilmərik. Hər iki yarış bizim üçün həddindən artıq ciddi olmalıdır. Mövcud qrafiq üzrə hərəkət etməliyik. Əlimizdə olan materialdan düzgün istifadə edib, bu oyunların hamısında maksimum nəticə qazanmalıyıq.

- Fariz Nəcəfov kluba prezident təyin olundu. Onun təyinatı ilə bağlı nə deyə bilərsiniz: Nəcəfovun gəlişindən sonra müsbət yöndə dəyişiklər hiss olunub?

- Fariz müəllim daim bizim komandanın içində idi. Həmişə maraqlanıb və bizdən dəstəyini əsirgəməyib. Hazırda isə dəyişən bir şey yoxdur. Onun da mövqeyi eynidir. Komandanın yanındadır və dəstəyini hiss edirik. Bizim üçün hər şey müsbətdir.

- Kubokda və Premyer Liqada mümkün uğursuzluqlar klubdakı taleyinizə təsir edə bilərmi?

- Bu barədə rəhbərliklə söhbətimiz olmayıb, ancaq mövsümün sonunda danışa bilərik. Bu, futboldur və hər şeyə hazır olmaq lazımdır. Heç vaxt bu barədə düşünməmişəm. Daim oyunlar və intensiz məşqləri fikirləşirəm. Futbolçularımız yaxşı formada olmalıdırlar ki, oyuna düzgün heyət buraxa bilək. Nəticə olsa da, olmasa da nə qərar verilsə, bu klub mənim üçün hər zaman çox doğmadır. Verilən qərara hörmətlə yanaşacağam.

- Futbolçunuz Bəhlul Mustafazadənin Şotlandiya "Seltik"indən dəvət aldığına dair iddialar yayılıb. Bu barədə nə deyə bilərsiniz?

- Bütün bunları mən də mətbuatdan oxumuşam. Kluba hər hansı rəsmi təklif gəlməyib. O, cavan və öz üzərində işləyən futbolçumuzdur. İstərdim ki, bu yazılar ona mənfi təsir göstərməsin. İşinə daha da məsuliyyətlə yanaşmalıdır. Son yazıların ardından məşqlərdə Bəhlula daha diqqətlə baxmağa başladım ki, bəzən belə hallar futbolçuya pis təsir edir. Amma o daha peşəkar oyunçu olmaq istəyir və bu yöndə işləyir. Mustafazadənin gələcəyi hələ qabaqdadır. Belə davam etsə və oyununda inkişaf olsa, niyə də Avropanın klublarında oynamasın?!

- Mövsüm yekunlaşmaq üzrə olsa da, müqaviləsi bitmək üzrə olan oyunçularınızla müqavilələr hələ də yenilənməyib və ümumiyyətlə, bu yöndə addım da atılmayıb. Niyə indidən danışıqlara başlanılmır?

- Bizdə ötən il və ondan əvvəlki illərdə də belə olub. Bəzi oyunçuların müqavilələri var. Sözləşmə müddətləri başa çatanlarla isə mövsüm bitəndən sonra danışıqlara başlanılır. Hazırda həm rəhbərlik, həm də biz daha çox nəticələrə köklənmişik. Lazım olarsa, mövsüm bitəndən sonra danışıqlar aparılacaq (Report).

 




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Mart 2024
B.eÇ.aÇC.aCŞB
01 02 03
04 05 06 07 08 09 10
11 12 13 14 15 16 17
18 19 20 21 22 23 24
25 26 27 28 29 30 31