"Döşəmədə yatanlar olub"

Milli komandamızın üzvü Rəşad Sadiqov Stadium.az saytına müsahibə verib. Futbolxeber.az həmin müsahibəni təqdim edir:

- İlk növbədə Portuqaliya ilə oyun haqda fikirlərini öyrənmək istərdik.

- Rəqibin gücünə bələd idik. Oyuna yaxşı başladıq. Lakin ardını gətirə bilmədik. Bundan da yaxşı oynamaq olardı. Amma alınmadı, rəqib güclü oyandı. Deyərdim ki, Portuqaliya rahat qələbə qazandı. Onsuz da əvvəl-axır qol vurmalıydılar. Rəqib bizi çox sıxışdırmışdı, biz də arxaya çox çəkilmişdik. Əks-hücumda 2-3 dəfə onları yaxalasaydıq, gözləri qorxacaqdı. Amma bizim əks-hücumlarımız yaxşı alınmadığından, rəqib daha ürəklə qabağa getdi. Bütün qüvvə ilə irəli atıldılar və istəklərinə çatdılar.

- İlk yarıda komandamız bir qədər fəal olsa da, fasilədən sonra tamamilə yoruldu. Bunun səbəbi nədir?

- Futbolda belədir ki, nə qədər çox müdafiə olunursansa, o qədər də çox güc itirirsən. Bir var topla oynayasan, bir də var topsuz. Fərq böyükdü. Topsuz oynayırsansa, tez yorulacaqsan. Millimizdə də belə oldu.

- Rauf Əliyevin meydandan qovulduğu epizod haqda nə deyə bilərsən?

- Hakim ikinci sarı vərəqəni verməkdə haqlı idi. Amma birinci epizodda o sarı vərəqə verməyə də bilərdi. Adi bir cərimə zərbəsində 2 sarı vərəqə göstərdi. Təbii ki, Raufun meydandan kənarlaşdırılması üzücü oldu.

- Komandamızın azlıqda qalmasının məğlubiyyətdə nə dərəcədə rolu oldu?

- Təbii ki, bunun da təsiri oldu. 10 nəfərlə Portuqaliyaya qarşı oynamaq çox çətin idi. Onsuz da 11 nəfərlə çətinlik çəkirdik, rəqibin qarşısını ala bilmirdik. Hər 4-5 dəqiqədən bir qapımızda təhlükə olurdu. Biz 10 nəfərlə qaldıqdan sonra Portuqaliya tamamilə irəli atıldı. 11 nəfərlə gücümüz eyni olmur, o ki qala 10 nəfər ola. Uşaqlar əllərindən gələni etdilər ki, hesabı qorusunlar. Amma alınmadı.

- Komandamız azlıqda qaldıqdan sonra Foqts meydana Levini buraxaraq, 5-li müdafiəyə keçdi. Bunun yenilgidə nə dərəcədə rolu oldu?

- Baş məşqçinin seçimidir, bir söz deyə bilmərəm. Amma fakt budur ki, millimiz heç vaxt belə oynamamışdı. İlk dəfə idi ki, bu cür taktika ilə oynadıq, özü də birdən-birə Portuqaliya kimi rəqibə qarşı. Bu da komandamızda çaşqınlıq yaratdı.

- Foqts bu oyunda sənə niyə şans vermədi?

- Bu haqda heç nə deyə bilmərəm. Baş məşqçi şans vermədiyinə görə, oynamaq qismət olmadı.

- Foqtsla aranızda nəsə problem var?

- Yox, aramızda problem yoxdu.

- Bəlkə Foqts səni qısqanır?

- Yalandan deyə bilmərəm. Axı onun qəlbini bilmirəm (gülür).

- Foqts Almaniya mətbuatına müsahibəsində deyib ki, Lüksemburqdan gələndə təyyarə sıx olduğuna görə bəzi futbolçular döşəmədə yatıb. Bu nə dərəcədə doğrudur?

- Bunu AFFA rəsmilərindən sorusşsanız, daha yaxşı olar.

- Axı, sən də həmin təyyarədə olmusan?

- Mən özüm barəsində onu deyə bilərəm ki, döşəmədə yatmamışam. Harda getmişdimsə, orda da qayıtmışam. Amma döşəmədə yatanlar olub.