15 Oktyabr 2019, Çərşənbə axşamı
Araz: “Üzrə görə xal vermirlər”
Holland hakim millimizdən üzr istədi!
Marko Rossi: “Xoşbəxtlikdən qol sayılmadı”
Tokio-2020-yə daha iki lisenziya

Ölkə futbolu

Etibar Cəbrayıloğlu: Xoşbəxtlikdən ölmək

Rəhmətlik Həsən bəy Zərdabi "Əkinçi”nin ilk sayını iyulun 22-də nəşr etdirsə də, yay jurnalistlərin sevimli fəsli deyil. Yayın bu istisində hadisə yerinə qaçmağı, müsahibə götürmək üçün şəhəri geninə-boluna ölçməyi kim istər ki?
Redaksiyanın tapşırığı "Demokl qılıncı” kimi başımın üstündən asılmışdı. "Neftçi”nin vitse-prezidenti Tahir Süleymanovla görüşüb müsahibə hazırlamalıydım. Məsələ konkret qoyulmuşdu. Yəni nəyin bahasına olursa-olsun, müsahibə ortada olmalı idi. 
Sərin otaqdan çıxıb vitse-prezidentlə görüşmək mənə cəhənnəm əzabı gəlirdi. Taleyim həll olunduğu anda nəsə fikirləşib tapmaq lazım idi. Fikirləşib tapdım. "Neftçi” rəsmisi onsuz da neçə illərdi eyni şeyi danışır. Bu üzdən Tahir Süleymanovla görüşüb eləmədən, telefonla danışmadan da müsahibə yazmaq olar. Yazdım da. Bu məsələdə yaddaşım köməyimə gəldi. 
- Tahir bəy, salam. Necəsiniz? 
- Çox sağ olun, yaxşıyam. Klubumuzun prezidenti Sadıq Sadıqov bizim yaxşı olmağımız üçün nə lazımdırsa edir. Sadıq müəllim isti havada sərin su içmək barədə ciddi tapşırıq verib. "Neftçi” xalq komandasıdı. Ona görə də bütün xalq bizə dua edir. Bilirsən ki, "Neftçi” ötən il Avroliqanın qrup mərhələsinə düşmüş komandadı. Biz "İnter”in meydançasında 2:2 oynadıq. 
- Klubda işlər necə gedir?
- Əla gedir. Bunun üçün klubun prezidentinə təşəkkür edirəm. Biz xalq komandası olduğumuzdan bütün xalq da mənin bu təşəkkürümə qoşulur. Biz ötən il qrup mərhələsinə düşəndə məşqlərə və oyunlara gedəndə avtobusumuzun təkəri fırlanırdı. Bu bir daha göstərir ki, klub doğru yoldadı. UEFA Azərbaycan futbolu haqqında düşünəndə ancaq "Neftçi”ni xatırlayır. Yaxşı bilirsən ki, biz ötən il qrup mərhələsinə düşdük, tarix yazdıq. Elə sən gəlməzdən 4 dəqiqə öncə UEFA-dan 1/ 07401195 S-F sylı məktub almışam. Həmin məktubda bildirilir ki, klubumuzun heç bir oyunçusu ötən il qızılcadan əziyyət çəkməyib. Bu nəticəyə görə "Neftçi” Avropada ilk beşlikdədi. Təbii ki, klubun prezidentinə minnətdaram. 
- Azərbaycan kubokunun finalında...
- Köhnə söhbətləri yenidən qabartmağa nə ehtiyac var. Yadda saxla ki, "Neftçi” hələ ötən əsrdə, yəni 1966-cı ildə SSRİ çempionatının bürünc medalını qazanıb. Sən gəlməzdən 3 dəqiqə öncə UEFA-dan (0348-3340-7612 nömrəli mobil telefonla zəng etdilər. Dedilər ki, biz həmişə Güloğlan Cabbarova azarkeşlik edirik. "Neftçi” "Partizan” kimi komanda ilə oynayan klubdu. Yeganə klubdu ki, bütün oyunçularımızda metro kartı var. Bunun özü bizim xalq komandası olmağımızı göstərir. Kartı bizə bağışladığına görə klubun hörmətli prezidentinə təşəkkür edirəm. 
- Bəzi həmkarlarım deyir ki, 1 saat 10 dəqiqə əvvəl klubun ofisinə FİFA-dan faks gəlib...
- Gözlərinin içində qədər yalan deyirlər. Faks 1 saat 9 dəqiqə əvvəl daxil olub. Biz peşəkar klub olduğumuzdan faksı faks aparatından qəbul edirik. Klub prezidentinin bununla bağlı təlimatı var. Bəzi ağzıgöyçəklərin dediyi həmin faksın sənə nömrəsini də göstərə bilərəm. Sadəcə, faks soyuducudadı. Biz "İnter”i Bakıya gəlməyə məcbur edən komandayıq. Xalq komandası faksı hara gəldi tullaya bilməz. 
- Faksın məzmunu...
- Biz Avropada tarix yazdığımıza görə tez-tez bizə yazırlar. Bu dəfə yazıb Misirin devrilmiş prezidenti Məhəmməd Mursinin yerini soruşurdular. Azərbaycan kubokunun finalından sonra Mahir Şükürovun atdığı şıllaq Konqonun Kənd Təsərrüfatı Nazirliyinin Təlim və Peşə Hazırlığı Mərkəzinin tədris vəsaitinə daxil olub. 
- Bəzi azarkeşlər...
- Mən bilirəm sən hansı azarkeşləri nəzərdə tutusan. Bakı metropoliteninin "Dərnəgül” stansiyasına çatanda qatarların səsi adama ləzzət edir. Biz azarkeşlərimiz üçün hər cür şərait yaratmışıq. Buna görə də klubun prezidentinə minnətdarlıq etmək istərdim. Klubun bazasına gələndə nə sağa dönürsən, nə sola. Bu bir daha göstərir ki, düz yoldayıq. Biz ötən il UEFA-ya 2/430009004 D saylı məktub yazıb bildirdik ki, oyunlarda bustı geyinmək istəyirik. UEFA da bizim tarix yazdığımızı nəzərə alıb istisna kimi, yalnız bizə-təkrar edirəm, yalnız bizə butsı geyinməyə icazə verdi. 
- Çox istərdim ki. "Şkenderbü” klubu ilə oyun...
- Əvvəla, onlar klub deyil, komandadı. Klub "Neftçi”di. İkincisi, rəqibimizin adı "Şkenderbü” deyil, "İsgəndər bəydi”. Əslində biz püşkdə Lüksemburqun "Differdanj” komandası ilə düşmüşdük. Lakin UEFA bizim türkçü klub olduğumuzu nəzərə alıb "İsgəndər bəy” komandası ilə oynamağımızı məsləhət gördü. Hətta mən deyərdim ki, bizə yalvardı. Klub prezidentinin tapşırığı ilə duşxanaya su da çəkilib. Bunun üçün minnətdarlığımı bildirirəm. Futbolçularımız xoşbəxtlikdən ölmək dərəcəsinə çatıblar. 
Tahir Süleymanovun əvvəllər verdiyi müsahibələrdəki bəzi sözləri dəyişməyə məcbur oldum. Yoxsa redaksiya rəhbərliyi elə biləcəkdi ki, köhnə müsahibəni təkrar çap edirəm. 
Yay tez bitsəydi gedib müsahiblərlə üzbəüz həmsöhbət olardım...  

bosman.at.ua


Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Oktyabr 2019
B.eÇ.aÇC.aCŞB
01 02 03 04 05 06
07 08 09 10 11 12 13
14 15 16 17 18 19 20
21 22 23 24 25 26 27
28 29 30 31