"Simurq" günü bir məşqlə tamamladı

"Simurq" Avstriyanın Tirol bölgəsində davam etdirdiyi yeni mövsümün hazırlıqları çərçivəsində dünən bir məşqə çıxdı. Futbolxeber.az-ın məlumatına görə, baş məşqçi Georgi Çixradzenin rəhbərliyi altında səhər hazırlığı iki saata yaxın davam etdi.

Əvvəlcə gürcü mütəxəssis yetirmələrini ətrafına toplayaraq onlarla qısa söhbət etdi. Bundan sonra isə məşqə start verildi. "İstanbul BB" ilə yoldaşlıq görüşündə 90 dəqiqə forma geyinmiş futbolçular komandadan ayrı, köməkçi məşqçi İqor Qetmanın rəhbərliyi altında hazırlığı davam etdirdi. Sonda isə öz aralarında qısa ötürmələrlə məşqi tamamladılar.

Digər qrup isı fiziki hazırlıq üzrə məşqçi Aleksandr Karakliçin rəhbərliyi alıtnda məşqə fiziki təmrinlərlə başladı. Daha sonra isə qısa ötürmələrdən ibarət taktiki çalışmaları yerinə yetirdilər. Hazırlığın sonunda isə Rəşad Eyyubov, Rövşən Əmiraslanov və Salif Ballo Georgi Çixradzenin rəhbərliyi altında qapıya zərbələr üzərində xüsusi məşq elədi.