Qurban Qurbanov: “Bizə lazım olan futbolçu ilə müsbət danışıqlar gedir”

"Komandamıza yeni transferlər gözlənilir. Sadəcə, yüz faizlik olmasa, dəqiq məlumat vermək istəmirik".

Futbolxeber.az saytının məlumatına görə, bu fikirləri sport24.az-a açıqlamasında "Qarabağ"ın baş məşqçisi Qurban Qurbanov bildirib.

Gözlənilən yeni transferlər haqda məlumat verən təcrübəli mütəxəssis ön xəttini gücləndirmək üzərində işlədiklərini söyləyib: "Polşalı müdafiəçi Yakub Rjezniçakın keçidi tam alınıb. Bizə lazım olan hücumameylli yarımmüdafiəçi mövqeyinə futbolçu ilə müsbət danışıqlar gedir. O, daha çox cinahda çıxış etsə də, bir neçə mövqedə oynaya bilən futbolçudu. Bəzi lazım olan oyunlarda müdafiədə də oynaya bilir. Onun keçidinin bugünlərdə həll olunmaq ehtimalı çoxdu".

Maraqlıdı, Qurban ad çəkməsə də, bu, hansı çempionatdan gələn legionerdir? Baş məşqçini dinləyək: "Onu deyə bilərəm ki, Türkiyə Super Liqasından gələn legionerdi. Çox effektli futbolçudu".

"Qarabağ"ı çalışdırıcısı danışıqlar apardıqları 2 hücumçudan da söz açıb: "İki futbolçu da var ki, onlarla hələ danışıqlar gedir. Bizim tərəfdən müsbət olan bir şey yoxdu. Ancaq danışıqlarımız davam edir. Hücum xəttinə minimum iki legioner gətirmək istəyirik".