"Qarabağ"ın qələbəsinə şahidlik edən hakim "Tromso" - "İnter" görüşündə

Avroliqanın II təsnifat mərhələsinin ilk oyunları çərçivəsində baş tutacaq "Tromso" - "İnter" matçının hakimi müəyyənləşib. Futbolxeber.az-ın məlumatına görə, matçı Yuri Mojarovski idarə edəcək. 1976-cı ildə Lvovda anadan olan ukraynalı referi FİFA-nın I dərəcəli hakimlər kateqoriyasına aiddir. 2008-ci ildən Ukrayna Premyer Liqasının oyunlarına təyinat alır. Mojarovski vətənində daha çox 2009-cu ildə Ukrayna kubokunun 1/2 final mərhələsi çərçivəsində baş tutan "Şaxtyor" - "Dinamo" (Kiyev) oyunundakı idarəçiliyi ilə tanınıb. Belə ki, həmin matçdan öncə Donets klubu əcnəbi hakim təıəb etsə də, federasiya sözügedən matçı Mojarovskiyə etibar etdi və o, işinin öhdəsindən uğurla gəldi.

2011-ci il, mayın 11-də onun idarə etdiyi "Dinamo" - "Şaxtyor" oyunu isə böyük narazılıqlara səbəb olmuşdu. Belə ki, Mojarovski ilk yarıda qonaqların qapısına mübahisəli penalti təyin etməklə yanaşı, ikinci hissədə "Şaxtyor"un baş məşqçisi Mirça Luçeskunu da meydandan qovdu.

Ukraynalı hakim 2 il əvvəl Avroliqada Azərbaycan klubunun oyununu idarə edib. Mojarovski 2011-ci il, iyulun 7-də Tofiq Bəhramov adına Respublika stadionunda baş tutan "Qarabağ" - "Banqa" (Litva) görüşünün baş hakimi olub. Həmin görüş Ağdam klubunun 3:0 hesablı qələbəsi ilə yekunlaşıb. Sözügedən matçda ukraynalı hakim komandamızın 2 futbolçusunu - Vüqar Nadirov (43-cü dəqiqə) və Maksim Medvedevi (71) sarı vərəqə ilə cəzalandırıb.