"Slima" ilə eyni vəziyyətdəyik"

“UEFA-nın ilk matçın vaxtını dəyişib, 2 gün əvvələ təyin etməsi bizim üçün sürpriz oldu. Buna görə planlarımızda dəyişiklik edildi”. Stadium.az xəbər verir ki, bunu “Xəzər Lənkəran”ın baş məşqçisi Con Toşak deyib.

“Ağ-yaşıllar”ın çalışdırıcısı Avropa Liqasının I təsnifat mərhələsi çərçivəsində “Slima” ilə oyunöncəsi mətbuat konfransı keçirib.

Yerli media nümayəndələrinin də qatıldığı tədbirdə ingiliscə danışmağa üstünlük verən uelsli çalışdırıcı komandasının qarşılaşmaya hazır olduğunu bildirib: “Malta yaxşı yadımdadır. Əvvəllər burda olmuşam. O vaxt “Slima”ya iki oyunda 17 qol vurmuşduq ki, bu da avrokuboklarda rekord sayılır. Komandamızı qarşılaşmaya hazır sayıram. Amma bizim favorit olmağımızla bağlı səslənən fikirlərlə razı deyiləm. Hazırlaşmaq üçün kifayət qədər vaxtımız olmadı. Bu səbəbdən “Slima” ilə eyni vəziyyətdəyik. Futbolda çətinliklər olur. Rəqibə hörmətlə yanaşıram. Malta klublarının tarixi var”.

Toşak daha sonra bildirib ki, komandanı daha da gücləndirmək fikrindədir: “Komandada müəyyən dəyişikliklər edildi. Fikrimcə, bu dəyişikliklər uğurlu oldu. Komandanı daha da gücləndirmək fikrindəyik. Qrupa düşməyə çalışacağıq. Buna nail olsaq, çox sevinərik. Amma bizə çətin olacaq”/