Böyükağa Hacıyev: "Skenderbeu" ilə ilk oyunumuzadək tam hazır olacağıq"

“Neftçi” baş məşqçisi Böyükağa Hacıyev Avstriyadakı təlim-məşq toplanışı çərçivəsində "Volqa"ya qarşı keçirilən oyunu (0:1) şərh edib. Futbolxeber.az-ın məlumatına görə, təcrübəli mütəxəssis klubun rəsmi saytına verdiyi açıqlamada yoxlama oyununda nəticənin önəm kəsb etmədiyini bildirib: "Təlim-məşq toplanışı çərçivəsində ilk yoxlama oyunumuz idi. Hər iki hissədə fərqli oyunçulara şans verdik. Fasilədən sonra 9 futbolçunu əvəzlədik ki, bu da nəticəyə təsirini göstərdi. Bununla belə, yoxlama oyunlarında nəticə önəm kəsb etmir. Məqsəd futbolçuların hamısına şans verib, onların hazırlıq səviyyəsini yoxlamaq idi. Bahadır Nəsimovun əsas heyətdə yerini qaytarmaq istəməsi məni sevindirir. Əminəm ki, yeni gələn hücumçular da Nikolas Kanalesin yoxluğunu unutduracaq. İnanıram ki, Çempionlar Liqasının ikinci təsnifat mərhələsindəki ilk oyunumuzadək tam hazır olacağıq".