Elxan Məmmədov: “Bakı” və “Xəzər Lənkəran”ın Premyer Liqanı tərk etməsi Azərbaycan futboluna böyük zərbədi”

AFFA-nın baş katibi Elxan Məmmədov Premyer Liqadan kənarda qalan “Bakı” və “Xəzər Lənkəran”dan danışıb.

Futbolxeber.az saytının məlumatına görə, futbolinfo.az-a müsahibəsində baş katib bunları söyləyib:

“Təbii ki, "Xəzər Lənkəran" və "Bakı"nın yoxluğu xüsusi olaraq hiss olunur.  Çünki "Xəzər Lənkəran" və "Bakı" Azərbaycan futbol bazarında vacib yerlər tutmuşdular. Hər iki klub Avroliqanın qrupunda olmasa da, seçmə mərhələsində oynamışdı. "Bakı"nın bir dəfə bəxti gətirməmişdi. Cəzalı futbolçu məsələsi yəqin ki, yadınızdadı. O olmasaydı, komanda, bəlkə də, qrupa qədər irəliləyəcəkdi. Hər ikisi böyük klub idi. Əsas odu ki, bazaları, infrastrukturları var idi. Yəni bir kluba lazım olan bütün şaraitə malik idilər. Amma onlar özəl təşkilatlardı. Özəl təşkilatların uğurlu və uğursuz nəticələri olur. Yəqin çətinliklə üzləşdilər ki, futboldan bir az uzaq olmalı idilər və ya qoyulan sərmayənin miqdarı azalmalı idi. Bu klubların Premyer Liqanı tərk etməsi Azərbaycan futboluna böyük zərbədi”.