29 Mart 2024, Cümə
Ağabala Ramazanov qayıtdı - FOTO
"Zirə"dən ardıcıl 15-ci qələbə
“Səbail”in hücumçusu: 1 qol, 2 qələbə
U-21 millimiz Ukraynaya da uduzdu

Ölkə futbolu

“Zaqatala” “Simurq”u unutdurub TƏƏSSÜRAT

Peşəkar Futbol Liqası və “Topaz”ın dəstəyi ilə jurnalistlərin bölgələrə səfərləri davam edir. Növbəti belə səfər dünən baş tutdu. Bu dəfə yolumuz Zaqatalaya idi.

FUTBOLÇU-SÜRÜCÜ

Son Şəmkir səfərində jurnalistərin sayının az olması səbəbindən bu dəfə bizi Zaqatalaya böyük avtobus deyil, Mercedes sprinter aparırdı. Yola düşdükdən az sonra PFL-in İnformasiya və İctimaiyyətlə Əlaqələr Departamentinin rəhbəri Aslan Şahgəldiyevin səsi eşidildi: “Uşaqlar, ilk xəbər hazırdı”. Məlum oldu ki, sprinterin sürücüsü keçmiş futbolçudu. Söhbət vaxtı ilə "Qartal", "Pambıqçı", Jitonmir ÇSKA-sında forma geymiş İlqar Məmmədovdan gedir.

DOMİNODA BİZƏ RƏQİB TAPILMADI

Zaqatalaya yolun uzaq olacağı əvvəldən məlum idi. Bu səbəbdən də yolda domino oynamaqla vaxt öldürməyə çalışırdıq. İdman mediasının dominodakı mübarizəsi kifayət qədər maraqlı alındı. Buna baxmayaraq, təvazökarlıqdan uzaq olsa da, deyim ki mən və həmkarım Emin Səfərova bu oyunda rəqib tapılmadı. Bütün cütləri məğlub etdik. İnsaf naminə ən güclü rəqiblərimizin Aslan Şahgəldiyev və Mirağa Mirzəyev olduğunu deməliyik. Lakin onlar da sonda təslim oldular.

Yolda yeganə qanqaraldıcı məqam həmkarımız Rauf İsgəndərovun özünü pis hiss etməsi idi. Sonda o, Qəbələdən geri qayıtmaq qərarına gəldi ki, İlkin Baba da onu yalnız buraxmadı.

ZƏDƏLİ MÜKAFATÇI

Budəfəki səfər üçün Zaqatalanın seçilməsi təsadüfi deyildi. Belə ki, PFL-in layihəsi olan “I Divizionda ayın ən yaxşı qolu” nominasiyasında ikinci qalib “Zaqatala”nın üzvü Emin Mehtiyev idi. Jurnalistlər və azarkeşlər arasında keçirilən sorğunun nəticəsinə əsasən, “Zaqatala”nın futbolçusunun MOİK-in qapısından keçirdiyi top oktyabr ayının ən yaxşı qolu seçildi.

Matçdan öncə qalibə pul mükafatını (500 AZN)  və xüsusi hədiyyəni Peşəkar Futbol Liqasının Texniki İdman Departamentinin rəisi Zamiq Hüseynov təqdim etdi. Zədəli olduğu üçün “Ağsu”ya qarşı oynamayan Mehtiyev mükafatı idman geyimində qəbul etdi.

Hələ Şəmkirə baş tutan ötən səfərimizdən sonra da yazmışdıq ki, PFL-in bu təşəbbüsü alqışlayiqdir. Söhbət təkcə mətbuatın I diviziona diqqəti artırmasından getmir. Bu layihə həm də Emin Mehtiyevin dediyi kimi, batmaqda olan futbolçuların üzə çıxmasına, yenidən parlamasına kömək edir.

İNQİLAB DAYI DA UNUDULMADI

Emin Mehtiyevdən sonra daha bir şəxs mükafatına qovuşdu. Bu, futbol aləmində çoxlarının tanıdığı, sosial şəbəkədə kifayət qədər fəal olan “Zaqatala”nın sadiq azarkeşi İnqilab Soltanov idi. İnqilab dayının 57 yaşı tamam oldu. “Zaqatala” rəhbərliyi də bu hadisəyə biganə qalmadı. Belə ki, klubun Müşahidə Şurasının rəhbəri Musa Qurbanov səbəbkara ad gününə uyğun 57 yazılmış formanı təqdim etdi.

Biz də öz növbəmizdə İnqilab dayını şam süfrəsi arxasında təbrik etdik. Onun “Zaqatala”ya olan sevgisi hər birimizə məlumdur. Bu cür fanatların sayı nə qədər çox olsa, bir o qədər yaxşıdır.

“ZAQATALA”NI SEVMƏK ÜÇÜN 2 CİDDİ SƏBƏB

Zaqatalada sonuncu dəfə 2015-ci ilin əvvəlində olmuşdum. Həmin vaxt yerli “Simurq” Draqan Çeranın dublu sayəsində “Qəbələ”ni 2:0 hesabı ilə məğub etmişdi. Geridə qalan müddətdə çox şey dəyişib.

Əvvəla, artıq “Simurq” yoxdur. Tarixin yaddaşına köçən klubu “Zaqatala” əvəzləyib. Üstəlik, hazırda klubun əsasını yerlilər təşkil edir. Klubun rəhbəri, baş məşqçisi, məşqçiləri, futbolçuların bəziləri əslən Zaqataladandır. Bu isə Zaqatala əhalisinin komandaya olan marağını daha da artırır. Yəni, adla yanaşı, yerlilərin çoxluğu “Zaqatala”nı sevdirən vacib məqamdır. Zaqatalada futbolu o qədər sevirlər ki, 35-40 yaşlı kişilər əyinlərindəki gödəkçəni çıxarıb, soyuqdan donan azyaşlılara verirlər...

2 il əvvəllə müqayisədə dəyişməyən əsas məqam zaqatalalıların futbola olan marağıdır. Düzdür, dünən şəhər stadionunda anşlaq yaşanmadı. Amma yenə də stadiona toplaşanların sayı bir çox Premyer Liqa matçlarını izləyənlərdən daha çox idi.

QONAQPƏRVƏR MUSA QURBANOV

Zaqatala şəhər stadionunda bizləri İnqilab Soltanov və klubun Müşahidə Şurasının sədri Musa Qurbanov qarşıladı. Musa bəyin jurnalistlərlə bir-bir görüşməsi, onları salamlaması xoş mənzərə idi. Kimin üçünsə bu, adi görünə bilər. Məsələ ondadır ki bu günə qədər Zaqatala da daxil olmaq dəfələrlə bölgələrə səfərimiz olub. Lakin klub rəhbərinin jurnalistləri şəxsən qarşılaşması ilə ilk dəfə idi ki qarşılaşırdıq.

Elə matçın fasiləsində də, 90 dəqiqənin sonunda da Musa bəy jurnalistlərlə maraqlanır, hər hansı bir problemin olub-olmadığını soruşurdu.

“ZAQATALA” QARŞISIALINMAZDIR?!

“Ağsu” üzərində 3:1 hesablı qələbə qazanan “Zaqatala” ardıcıl 8-ci oyunda da aktivinə 3 xal yazdı. Şaban Şirdanovun komandası sonuncu dəfə IV turda “Şəmkir”ə 1:2 hesabı ilə uduzub. Son turlar inamla irəliləyən “Zaqatala” əsas rəqibləri üzərində də qələbələri sıralayır. Heyətində kifayət qədər təcrübəli futbolçu olan komanda oyun baxımından hətta hazırda çempionatın lideri olan “Turan Tovuz”dan da geri qalmır. Əksinə, bəzi komponentlərdə rəqibindən üstün də görünür.

Bir sözlə, Şaban Şirdanovun komandası artıq qarşısıalınmaz kollektivə çevrilib. Bu gedişlə “Zaqatala”nı növbəti mövsümdə Premyer Liqada görəcəyik. Əminliklə söyləmək olar ki, komanda bu rəhbərliklə, bu baş məşqçi ilə, bu futbolçularla yüksək liqada oynamağa layiqdir.  

Sonda Zaqatalaya səfərimizi təşkil edən PFL və Topaz rəhbərliyinə təşəkkür edirik.

İBRAHİM

Bakı-Zaqatala-Bakı




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Mart 2024
B.eÇ.aÇC.aCŞB
01 02 03
04 05 06 07 08 09 10
11 12 13 14 15 16 17
18 19 20 21 22 23 24
25 26 27 28 29 30 31