“I divizionun səviyyəsi 180 dərəcə dəyişib”

“Komandamız çempionatda çoxdandı qələbə qazanmırdı. 3 oyun ard-arda uduzmuşduq. “Şəmkir”lə kubok oyunundan sonra komanda bir qədər özünə gəldi. “Rəvan”la görüşə yaxşı başladıq. Lakin ilk 30 dəqiqədən sonra oyunçularda arxayınlaşma oldu. İkinci hissədə isə üstünlük tamamilə bizim tərəfimizdə idi. Vurulan qollar da bunun sübutudur. Futbolçulardan birinci hissədə 50, ikinci hissədə 90 faiz razı qaldım”. Futbolxeber.az saytına müsahibəsində bu sözləri “Qaradağ-Lökbatan”ın baş məşqçisi Azər Bağırov deyib.

Lökbatan təmsilçisi I divizionun 7-ci turunda “Rəvan”ı 4:1 hesabı ilə məğlub edib. Bir neçə gün əvvəl baş məşqçi postunda Əfqan Talıbovu əvəzləyən Azər Bağırov komandası ilə birgə çempionatda ilk qələbəsini qazanıb.

Bağırov “Qaradağ-Lökbatan”ın məqsədi barədə sualı belə cavablandırıb: “Məqsəd çempionluqdur. Rəhbərlik mövsümün əvvəlindən komandanın qarşısına bu tapşırığı qoyub. Lakin hazırda məqsədimiz bu vəziyyətdən çıxmaqdır. Bütün oyunlardan qələbə ilə ayrılmağa çalışacağıq. İlk dövrənu yuxarı pillələrdə başa vurmalıyıq ki, fasilədən sonra çempionluq uğrunda mübarizə apara bilək”.

Baş məşqçi qeyd edib ki, fasilədə komandası güclənməlidir: “İlin sonunda komandanın maliyyə vəziyyəti daha da yaxşılaşdırmalıdır. Fasilədən sonra hər şey planlaşdırdığımız kimi olsa, maksimum nəticə qazanmaq mümkündür”.

“Qaradağ-Lökbatan”ı 8-ci turda çətin oyun gözləyir. Belə ki, komanda səfərdə “Zaqatala”nın qonağı olacaq. Baş məşqçi həmin oyundan da söz açıb: “Zaqatala” turnir cədvəlində bizdən irəlidədir. Son tur böyükhesablı qələbə qazanıblar, əhval-ruhiyyələri yaxşıdır. Amma bizim də məqsədimiz 3 xaldır. Düşünürəm ki, komanda bacardığının 60-70 faizini etsə, Zaqatalada rahat qələbə qazana bilərik”.

Sonda isə “Qaradağ-Lökbatan”ın çalışdırıcısı həm komandasının, həm də I divizionun səviyyəsini dəyərləndirib: “Məni komandada qan etməyən yalnız psixoloji durum idi. Yaxşı futbolçularımız var. Üstəlik, oyundan oyuna artıracağıq. Cari mövsümdə I divizionun səviyyəsi yüksəkdir. 14 komandadan 8-9-u yüksək pillələr uğrunda mübarizə aparır. Əvvəlki illərlə müqayisədə I divizionun səviyyəsi müsbət mənada 180 dərəcədə dəyişib”.

Söhbətləşdi: FƏRƏC

“Layihə AFFA yanında media komitəsi tərəfindən maliyyələşdirilir”