Riçard Almeyda: “Bu, tez unudulası hadisə deyil”

“İnter” yaxaladığı imkanları qola çevirdi. Bu gün komanda şəklində uduzduq”. Futbolxeber.az saytının məlumatına görə, bu sözləri “Qarabağ”ın yarımmüdafiəçisi Riçard Almeyda Topaz Premer Liqasının ilk turunda “İnter”ə 1:2 hesabı ilə uduzduqları görüşdən sonra deyib.

O, Çmepionlar Liqasındakı uğursuzluğu unutmadıqlarını qeyd edib: “Çexlərlə görüşün başa çatmasına 5 dəqiqə qalmış qələbəni əldən verdik. Bu, tez unudulası hadisə deyil. Baş verənlər hamımıza pis təsir edib. İnanırdıq ki, Çempionlar Liqasının qrupuna vəsiqə qazanacağıq. Lakin alınmadı. Artıq irəli baxmaq lazımdır. İndi “Sumqayıt”la matçı düşünməliyik”.

Almeyda kluba yönələn tənqidlərə də münasibət bildirib: “İndi bizim üçün vacib olan işimizi görmək və baş məşqçimizin tapşırıqlarını yerinə yetirməkdir. Kənardan deyilənlərə fikir vermirik. Azərbaycan dilini bilməsəm də, mətbuatda yazılanlar barədə ümumi məlumatım var”.

Almeyda Çempionlar Liqasından kənarda qalmalarına görə Qurban Qurbanovun tənqid olunmasını düzgün hesab etmir: “Günahı Qurban Qurbanovun üzərinə yıxmaq düzgün deyil. İndiyə qədər qazandığımız uğurlar onun əməyinin nəticəsidir. Biz komanda şəklində bir olmalıyıq”.