CBC-Sport AZAL və “Neftçi”nin futbolçularına niyə zülm verdi?

Dünən Topaz Premyer Liqasında 2016/17 mövsümünə start verilib. Ardıcıl ikinci mövsüm çempionatın oyunlarını CBC-Sport yayımlayır. Həm kanalın, həm də Peşəkar Futbol Liqasının rəsmi saytı ilk turun bütün matçlarının canlı yayımlanacağını elan etmişdi. Lakin tamaşaçılar dünən keçirilən “Zirə” - “Sumqayıt” oyununu izləyə bilmədilər.

CBC-Sportun redaktoru Şəmsəddin Abbasov futbolinfo.az-a açıqlamasında Zirədə oynanılan görüşün canlı yayımlanmamasının səbəbini belə izah edib: “Özümüzdə 1 səyyar televiziya var. İkincisini “Saran”dan icarəyə götürürük. Sifariş də vermişik. Amma sənədləşməylə bağlı Gürcüstan sərhəddində yubanma olub. Bu üzdən də 2 gün gecikirlər. Bazar ertəsi artıq ixtiyarımızda olacaq. Bundan sonra söz verdiyimiz kimi, bütün oyunları canlı yayımlayacağıq”.

Yayımın baş tutmamasının səbəbini anladıq. Amma anlamadığımız məqam odur ki, Zirədəki görüşün canlı yayımlanmayacağı əvvəldən məlum olduğu halda, AZAL - “Neftçi” görüşünün başlama saatı niyə dəyişməyib? Məlum məsələdir ki, Şüvəlandakı qarşılaşmanın 18:00-da təyin edilməsi sırf yayımla bağlı idi. Yoxsa ki bu cür istidə, özü də süni meydandakı oyun niyə 18:00-da start götürsün? Şüvəlandakı görüşdə heç azarkeşlər tribunada istidən otura bimirdilər. Belə olan halda, futbolçuların necə əziyyət çəkdiklərini təsəvvür etmək çətin deyil. Qarşılaşmadan sonra onlar da oyunun başlama vaxtından gileylənirdilər...

Bir sözlə, belə çıxır ki Zirədəki görüşün canlı yayımlanmayacağını əvvəldən bilən CBC Sport AZAL və “Neftçi”nin futbolçularına qəsdən zülm verib. Axı, görüşün vaxtını 2, yaxud 1 saat geri çəkmək elə də çətin deyildi...

Futbolxeber.az