Qara Qarayev: “Bir həftə sonra bizi çətin görüş gözləyir”

“İkinci hissədə rəqib tamamilə qapandı, biz heç nə edə bilmədik. Buna görə də deyə bilərəm ki, ikinci oyun çox çətin keçəcək”. Futbolxeber.az saytına müsahibəsində bu sözləri “Qarabağ”ın üzvü Qara Qarayev deyib.

Yarımmüdafiəçi Çempionlar Liqasının II təsnifat mərhələsinin ilk oyununda “Düdelanj”ı 2:0 hesabı ilə məğlub etdikləri görüş barədə bunları söyləyib: “Oyunda bəzi çatışmazlıqlarımız var idi. İkinci oyuna yaxşı hazırlaşacağıq. Düşünürəm ki, arxayınçılıq olmamalıdır. Kimsə düşünməsin ki, artıq turu keçmişik. Belə fikirlər bizə ziyan vura bilər. Evdə sərfəli nəticə qazanmağımıza baxmayaraq, bir həftə sonra bizi çətin görüş gözləyir”.

Qara Qarayev Ağdam klubunun ÇL-in qrup mərhələsinə düşmək perspektivi haqda sualı belə cavablandırıb: “Səhvlərimizi düzəldib, yaxşı nəticə qazansaq, ÇL-də qrupda oynaya bilərik”.