AFFA açıqladı: Şeydayevin millimizdəki taleyini Prosineçki müəyyənləşdirəcək

“Ramil Şeydayev Azərbaycan millisində oynamaq istəyir. Özü bununla bağlı AFFA-ya müraciət edib”. Futbolxeber.az saytının məlumatına görə, bu sözləri apasport.az-a açıqlamasında AFFA-nın İnformasiya və İctimaiyyətlə Əlaqələr Departamentinin rəisi Mikayıl Nərimanoğlu deyib.

“Zenit”lə yolları ayrılan və karyerasını Türkiyənin “Trabzonspor” klubunda davam etdirəcəyi gözlənilən Ramil Şeydayev milli karyerası ilə bağlı qərarını dəyişib. Belə ki, bu vaxta qədər Rusiyanın 16, 17, 18, 19 və 21 yaşadək yığmalarında çıxış etmiş Azərbaycan əsilli hücumçu daha ruslara xidmət etmək fikrində deyil. 20 yaşlı futbolçu bundan sonra Azərbaycan yığmasının formasını geyinmək istəyir.

Mikayıl Nərimanoğlunun sözlərinə görə, Şeydayevin istəyi millimizin baş məşqçisi Robert Prosineçkiyə artıq çatdırılıb: “Şeydayev AFFA-ya müraciətində Azərbaycan yığmasında oynamaq istədiyini bildirib. Biz də onun istəyini Robert Prosineçkiyə çatdırmışıq. Baş məşqçinin Ramillə bağlı qərarı heyəti açıqlayanda bəlli olacaq. Hər şey FİFA-nın qaydalarına əsasən olmalıdı”.

Qeyd edək ki, Rusiyanın Sankt-Peterburq şəhərində doğulan Ramil Şeydayevin atası azərbaycanlı, anası isə rusdu.