Fariz Nəcəfov: “Samtredia”nın zəif komanda olduğunu düşünmürəm”

“Az öncə rəqibimizin kimliyini öyrəndim. Açığı, “Samtredia”nı tanımıram, amma zəif komanda olduğunu düşünmürəm”. Futbolxeber.az saytının məlumatına görə, bunu apasport.az saytına “Qəbələ”nin vitse-prezidenti Fariz Nəcəfov deyib.

2016/17 mövsümündə Azərbaycanı Avropa Liqasında təmsil edəcək “Qəbələ” ilk mərhələdə Gürcüstan təmsilçisi “Samtredia” ilə qarşılaşacaq.

Nəcəfov rəqibin heç də zəif olmadığını söyləyib: “Düzdü, nisbətən zəif rəqiblə düşəcəyimizi gözləyirdik. Amma “Samtredia” Gürcüstan çempionatında ötən mövsümü 2-ci pillədə başa vurub. Üstəlik, heyətlərində yaxşı oyunçular da var. Hər halda, Avropa Liqasına vəsiqə qazanıblarsa, deməli, ehtiyatlanmağa dəyər. Məncə, azarkeşləri maraqlı oyunlar gözləyir”.

“Qəbələ” ötən mövsüm Avroliqanın I mərhələsində Gürcüstanın digər təmsilçisi “Dinamo” ilə qarşılaşmış və rəqibini üstələmişdi. Həmin vaxt Gürcüstanda təhlükəsizlik tədbirlərinin qaydasında olmaması “Qəbələ” rəsmisini budəfəki səfər öncəsi narahat etmir: “Biz hər zamankı kimi, təhlükəsizlik tədbirlərinə yüksək səviyyədə riayət edəcəyik. İnanmıram ki, Gürcüstanda hər hansı bir problemlə üzləşək”.