Cavid Hüseynov məhkəmədə çıxış etdi: “Bu sözləri eşidəndə dəli oldum”

Bu gün Səbail Rayon Məhkəməsində ann.tv-nin əməkdaşı Rasim Əliyevin döyülərək öldürülməsi işi üzrə həbs edilən "Qəbələ"nin sabiq kapitanı Cavid Hüseynovun cinayət işi üzrə məhkəmə prosesi davam etdirilib. Futbolxeber.az saytının məlumatına görə, hakim Elmar Rəhimovun sədrliyi ilə keçirilən prosesdə şahid qismində Rasim Əliyevin dostu Aydın Mahmudov ifadə verib. A.Mahmudov R.Əliyevin yanında olarkən C.Hüseynovun klubun meneceri Səbuhi Səfiyarlı ilə birgə xəstəxanaya gəldiyini deyib: “Cavid xəstəxanaya gələrkən mən orda idim. Onun yanında “Qəbələ”nin meneceri Səbuhi Səfiyarlı da var idi. Kənardan baxan şəxs kimi deyə bilərəm ki, Cavid xəstəxanaya gələrkən hadisədən xəbərsiz idi. Hətta Rasimdən soruşdu ki, niyə ora getmisən? Sənə mənim adımdan çox adam zəng vura bilər. Cavid heç kimə orada heç bir təklif etməyib. Şikayət olunmayacağı təqdirdə, müalicə xərclərini üzərinə götürəcəyi ilə bağlı deyilənlər həqiqət deyil. Orada belə söhbət olmayıb. Cavidgil xəstəxanaya gəldikdən az sonra polislər də özlərini xəstəxanaya çatdırmışdılar”.

Daha sonra məhkəmə prosesində söz Cavid Hüseynova verilib. O, hadisədən xəstəxanada xəbər tutduğunu qeyd edib: “Biz palataya daxil olduqdan sonra Rasimlə söhbət etdik. O, telefon və pulqabısının itdiyini dedi. Bu sözləri eşidəndə dəli oldum. Dərhal Elşənə zəng vurdum. Daha sonra polislər xəstəxanaya gəldi. Düşündüm ki, daha mənlik burda heç nə yoxdur və xəstəxanadan ayrıldım”.

Çıxışların ardından cinayət işinin məhkəmə istintaqı başa çatıb. Prokuror Cavid Hüseynova 4 il iş istəyib. Cavidin vəkili Adəm Məmmədov isə müdafiə çıxışı üçün vaxt istəyib.

Hakim bildirib ki, növbəti məhkəmə prosesi mayın 16-da keçiriləcək.