"Oyunda bəzilərinin ayaqları əsir"

U-21 milli komandamızın qapıçısı, seçmə mərhələnin ilk oyununda dünən Makedoniyaya qarşı matçda 90 dəqiqə meydanda olan Andrey Popoviç qarşılaşmadan sonra Futbolxeber.az saytına müsahibə verib.

- Millimiz ilk oyununda Makedoniya ilə qolsuz bərabərə qaldı. Matç haqda nə deyə bilərsən?

- Nə deyə bilərəm ki? Qələbə qazana bilmədiyimizə görə çox təəssüflənirəm. Fikrimcə, heç də pis oynamadıq. Qələbə qazana bilərdik. Xüsusən də rəqib azlıqdan sonra. Amma say üstünlüyündən də istifadə edə bilmədik.

- Qələbə qazanmağımıza nə mane oldu?

- Birinci hissədə rəqibdən qorxurduq. Amma bunun nədən qaynaqlandığını da bilmirəm. İkinci hissədə daha yaxşı oynasaq da, bəzi epizodlarda ustalıq səviyyəsinin aşağı olması özünü göstərdi.

- Deyirsən ki, ilk hissədə komanda rəqibdən qorxurdu. Bu, nədən irəli gəlirdi?

- Bunun konkret hansı səbəbdən qaynaqlandığını bilmirəm. Belə götürəndə məşqlərdə hər şey yaxşıdır. Amma oyuna çıxanda bəzi oyunçuların ayaqları əsir.

- Fasilədə paltardəyişmə otağına baş məşqçi Bernhard Lippert komandaya hansısa irad bildirdi?

- Dedi ki, komanda irəlidə daha cəsarətli oynamalıdır.

- Makedoniya ilə qarşılaşmaya əsasən millimizin oyununda inkişaf olduğunu demək olar? Yoxsa, hər şey elə əvvəlki kimidir?

- Hesab edirəm ki, indiki komanda son illərdəki ən güclü U-21 yığmasıdır.

- Bir qədər də əsas millidən danışaq. Lüksemburqla oyuna baxdın?

- Baxdım. Düşünürəm ki, uşaqların bəxti gətirmədi. Xeyli sayda qol epizodu yaratsalar da, bunun yalnız birindən faydalandılar. Amma oyunun sonunda uduza da bilərdilər.

- Razısan ki, Lüksemburqla Bakıda heç-heçə etmək biabırçılıqdır?

- Bunun biabırçılıq olduğunu söyləmək düzgün deyil. Hesab edirəm ki, komandanın bəxti gətirmədi.

- Onda sualı belə qoyum. Əgər, Lüksemburqu məğlub edə bilmiriksə, o zaman hansı komandaya qalib gələcəyik? Axı, biz Lüksemburqa qrupun autsayderi gözü ilə baxırdıq...

- Bəli, razıyam ki, Lüksemburqu udmaq lazım idi. Amma bu futboldur və istənilən nəticə qeydə alına bilər.

- Son zamanlar Foqts sənə dəvət göndərmir. Nə problem var?

- Bilmirəm. Bir müddət əvvəl alkoqolla bağlı problem olmuşdu. Amma bu artıq keçmişdə qalıb. İndi isə mənə dəvət göndərməsinin səbəbini bilmirəm.

- Aydın məsələdir ki, Kamran Ağayev millidə "1 nömrə"di. Bəs, digər iki qapıçısı hansı cəhətlərinə görə səndən üstündürlər ki, onlara dəvət gəlir, sənə yox?

- Yaxşı olardı ki, siz bu sualı mənə yox, Foqtsa ünvanlayasınız.

- Yeni mövsümdən hansı komandada çıxış edəcəksən?

- "Bakı" ilə müqaviləm artıq başa çatmaq üzrədi. Azərbaycan və xarici klublardan təklif almışam. Amma hələ ki yekun qərara gəlməmişəm.

- "Bakı" ilə müqavilən nə vaxt bitir?

- İyulda.

- Təklif aldığın klublar hansılardı?

- Bu haqda hələ danışmaq istəmirəm. Müqavilə imzaladıqdan sonra ad açıqlayacağam.

- Səni transfer etmək istəyən klublar ötən mövsüm birinci "altılıq"da mübarizə aparanlardı, yoxsa ikinci "altılıq"da?

- Həm birinci, həm də ikinci "altılıq"dan təklif var.

- Yəqin ki, ölkə xaricindən aldığın təkliflər də Ukraynadandır?

- Həm Ukraynadan təklif var, həm də Türkiyədən.

- Bəs, həmin klublar yüksək liqada çıxış edirlər, yoxsa birinci divizionda?

- Ukrayna klubu yüksək liqada, Türkiyə təmsilçisi isə birinci divizionda mübarizə aparır.

- Türkiyə klubu təsadüfən "Dənizlispor" deyil?

- Yox.

- Transferin nə zaman dəqiqləşəcək?

- İndi evə gedirəm. Bir müddət istirahət edəcəyəm. İstirahət etmk istəyirəm. Bir qədər yorğunluq var. İstirahət vaxtı bütün məsələlərə aydınlıq gələcək.

Elman MƏHƏRRƏMOV