“Futbolçularımızın oyununa 10 bal vermək olardı”

19 yaşadək qızlardan ibarət komandalar arasında Avropa çempionatının elit-raund mərhələsində keçirilmiş Azərbaycan -  Polşa oyunundan sonra yığmamızın baş məşqçisi Patrisiya Qonzales affa.az-a açıqlama verib. Futbolxeber.az saytının məlumatına görə, ispan mütəxəssis komandasının yaxşı oyun nümayiş etdirdiyini bildirib: “Oyunumuz barədə müsbət fikirlər söyləyə bilərəm. Futbolçularımız yaxşı oyun nümayiş etdirdilər. Əlbəttə, ümumilikdə, turnirin şərtlərini nəzərə alsaq, ilk oyunda heç-heçə bizi tam qane edən nəticə deyil. Bununla belə, futbolçularımızın oyununa 10 ballıq sistemlə ən yüksək qiymət - 10 bal vermək olardı. Qələbəyə çox yaxın olduq. Lakin yaratdığımız epizodları qola çevirə bilmədik.”