Şahin Diniyev: “Kəpəz” göstərdi ki, hər bir rəqibə qarşı futbol oynamağı bacarır”

“Əvvəlcə bu soyuq havada bizi dəstəkləməyə gələn azarkeşlərimizə minnətdaram. Oyuna gəlincə, matç bizim üçün ağır keçdi”. Futbolxeber.az-ın məlumatına görə, bunu “Kəpəz”in baş məşqçisi Şahin Diniyev Premyer Liqanın XX turunda AZAL-ı 2:0 hesabı ilə məğlub etdikləri oyundan sonra deyib.

Təcrübəli mütəxəssis komandasının qələbəsini belə şərh edib: “AZAL atletik, mübarizəni sevən komandadır, müdafiədə etibarlı oynayır. Altı oyun idi ki, qapısından top buraxmırdı. Biz bunu bilirdik. Komandam göstərdiyi taktiki-texniki, kombinasiyalı oyundan başqa bu gün atletik futbol oynamağı bacardığını da sübut etdi. Uşaqlar göstərdilər ki, hər bir rəqibə qarşı futbol oynamağı bacarırlar. Hesab oyuna görə oldu. Futbolçulara təşəkkür edirəm, yaxşı mübarizə apardılar. Bizi qarşıda “Qarabağ”la çətin görüş gözləyir. Həmin matça hazırlaşmalıyıq” (klub saytı).