Araz Abdullayev: “Rəvan”ı aşağılamaq istəmirəm, amma...”

"Neftçi”nin yarımmüdafiəçisi Araz Abdullayev Premyer Liqanın XX turunda “Rəvan”la heç-heçə oynadıqları (1:1) görüşü şərh edib. Futbolxeber.az saytına müsahibəsində təcrübəli futbolçu deyib: “İlk yarıda yaxşı oynamadıq. Amma ikinci hissə başlayanda istədik ki, rəqibi əks-hücumda yaxalayaraq qol vuraq. Özümüz qol buraxsaq da, ruhdan düşmədik. Hesabı bəraləşdirdik. Lakin ikinci qolu da vura bilərdik”.

Abdullayev növbəti oyunda qələbə qazanmağa çalışacaqlarını qeyd edib: “Çalışacağıq ki, “Xəzər Lənkəran"la matçda qələbə qazanaq. "Qarabağ", "Qəbələ" kimi komandalarla oyunlarda istər-istəməz oyuna köklənmə daha yaxşı olur. "Rəvan" kimi komandalarla oyunlarda isə öz aramızda da danışırıq, çalışırıq ki, rəqibə daha ciddi yanaşaq. Bu, futboldur. "Rəvan"ı aşağılamaq istəmirəm. Amma "Neftçi"yə qarşı imkanlarından daha artıq səviyyədə çıxış edirlər”.

Araz Abdullayev matçın hakimliyi barədə bunları vurğulayıb: “Matçdakı narazılıqlar elə oyunda qaldı. Meydandan kənarda Əsgərovla yaxın dostuq, söhbət edirik. Hamı istəyir ki, qalib gəlsin. Oyunun tempi bir az qalxanda istəyirsən ki, sürət daha da yüksək olsun. Çünki bu halda oyun həm baxımlı, həm də qol vəziyyətləri çox olur. Oyun tez-tez dayananda temp də ölür, istədiyini də əldə edə bilmirsən. Etirazlarımız sırf futbolla bağlı idi. Başqa bir şey yox idi".