“Neftçi” “Domjale”dən cavab gözləyir: “Təklifimizi qəbul etsələr, transfer reallaşacaq”

"Sloveniyanın “Domjale” klubu həqiqətən də Samir Məsimovun transferi ilə bağlı “Neftçi”yə təklif göndərib”. Bunu Futbolxeber.az saytına açıqlamasında “Neftçi”nin mətbuat xidmətinin rəhbəri Mehman Rəsulov deyib.

Klub rəsmisi hazırda qarşı tərəfdən cavab gözlədiklərini bildirib: “Biz həmin təklifi dəyərləndirməyə hazırıq. Artıq qarşı tərəfə şərtimizi bildirmişik. Hazırda onlardan cavab gözləyirik. “Domjale” təklifimizi qəbul etsə, transfer reallaşacaq”.

M. Rəsulov keçidə görə Sloveniya klubundan transfer haqqı istəmədiklərini bildirib: “Şərt maddi məsələ ilə bağlı deyil. “Neftçi” bu keçiddən pul qazanmaq istəmir. Futbolçunu havayı buraxmağa hazırıq. Şərtimiz odur ki, gələcəkdə “Domjale” Samir Məsimovu başqa kluba satacağı halda, həmin keçiddən “Neftçi”yə də pay düşməlidir. Bu, çox sadə şərtdir”.