“Bakı”da klubdaxili toplantı: “Heç kimi zorla komandada saxlamayacağıq”

Qış fasiləsindən sonra “Bakı”nın üzvləri bu gün bir araya gəliblər. Klubdan Futbolxeber.az saytına verilən məlumata görə, bazada bu gün toplantı keçirilib. Toplantıda icraçı direktor Yaşar Seyidov, məşqçilər, futbolçular, eləcə də klubun əməkdaşları iştirak edib.

Yaşar Seyidov çıxışında klubun ümumi vəziyyətindən söz açıb. Seyidov bildirib ki, heç kimi zorla komandada saxlamayacaqlar. Istəyən gedə bilər. Kim məşqlərdə və oyunlarda iştirak edəcəksə, qala bilər. “Bakı”nın gələcəyi ilə bağlı konkret söz deməyən Seyidov, bütün suallara klub prezidenti Hafiz Məmmədovun vətənə qayıdışından sonra aydınlıq gələcəyini vurğulayıb. Sonda bildirilib ki, komanda sabahdan etibarən məşqlərə start verəcək.

Qeyd edək ki, rəsmi olaraq “Bakı” Elşad Manafov. Rüstəm Rüstəmli. Yusup Hakimov və Umar Akmurzayevlə yollarını ayırıb. Kamil və Habil Nurəhmədov qardaşları isə hazırda klubdan cavab gözləyirlər. Vəziyyət düzələcəyi halda, onlar yenidən “Bakı”nın formasını geyəcəklər.