“Qarabağ” əsl gücünü “Tottenhem”lə oyunda göstərəcək”

AFFA Məşqçilər Komitəsinin sədri Vaqif Sadıqovun müsahibəsi

- Əvvəlcə millimizin Moldova ilə yoldaşlıq oyunu (2:1) haqda fikirlərinizi öyrənək... 

- Bu oyun hər birimizi  sevindirdi. Eksperimental heyətlə oynamaq gələcəyə atılan bir addım idi. Eksperimentin özünü doğruldtuduğunu deyə bilərik. Robert Prosineçkinin rəhbərliyi altında yığmamız oyundan –oyuna yaxşı təsir bağışlayır. Bu da ümid verir ki, gələcəkdə güclü bir milli komandamız olacaq. Hamımız əsas millimizin ətrafında birləşməli və uğurlarına sevinməliyik.

- Uğursuz çıxışları ilə yadda qalan U-21 millimizin Rusiyaya böyük hesabla (3:0) qalib gəlməsi sizin üçün də gözlənilməz oldu?

- Komandalarımızdan hər zaman qələbə gözləyirəm. Ardıcıl məğlubiyyətlərdən sonra güclü rəqibə qalib gəlmək onu göstərdi ki, potensialımız var. Komandamız Rusiya üzərində tarixi qələbə qazandı. Əsas millimizin ən yaxın ehtiyat qüvvəsi olan U-21 ağır bir məqamda çıxış yolu tapdı. Komanda o zaman güclü olur ki, özünə inanır. Bunu 21 yaşlılardan ibarət komandamızda gördük. 

- U-19 millimiz isə bizi təəssüfləndirdi.

- Komandamız son oyunda əsas simasını göstərdi. Yəqin ki, ilk uğursuzluqlardan sonra nəticə çıxarmışdılar. Nəzərə almaq lazımdır ki, Nazim Süleymanov cəmi 4-5 aydır ki, bu komandanı çalışdırır. Buna görə də ona güzəşt etmək olar. Yığmamızın son oyunu da ümid verdi ki, zəncirvari bağlılıqla gələcəkdə böyük bir inkişafa doğru addım atacağıq. Əsas millimizə təkan verəbiləcək potensiallı gənclərimiz var.  

- Təəssüflənidirici məqamlardan biri də U-19 millimizdə müəyyən futbolçuların intizamsızlıq etməsi oldu. Bu yaşda futbolçuların səhvləri nə dərəcədə bağışlanandır? 

- Belə halların olmaması mümkün deyil. Ən vacibi odur ki, belə hallara qarşı düzgün mübarizə aparılsın. Bu yaşda olan futbolçular tam formalaşmırlar. Onları düz istiqamətə yönəltmək lazımdır ki, gələcəkdə istedadlı futbolçuları itirməyək. Hesab edirəm ki, atılan addımlar düzdür. 
- Son günlər “Neftçi”nin üzləşdiyi uğursuzluqlar haqda çox danışıldı. Bir vaxtlar çalışdırdığınız komandanın acınacaqlı durumu ilə bağlı nə deyə bilərsiniz?

- Mən düşünmürəm ki, “Netçi”nin vəziyyəti o qədər də acınacaqlıdır. İstənilən komanda bu duruma düşə bilər. Ən vacibi bu vəziyyətdən çıxış yolu tapmaqdır. Klub rəhbərliyi çalışır ki, tezliklə komandanı bu vəziyyətdən çıxarsın. İnanıram ki, yaxın vaxtlarda biz tamamilə fərqli bir “Neftçi” görəcəyik və bu  komandanın da uğurlarına sevinəcəyik. 

- Avropa Liqasının qrup mərhələsində mübarizə aparan komandalarımızı çətin oyunlar gözləyir. “Qarabağ” doğma meydanda “Tottenhem”lə, “Qəbələ” isə səfərdə PAOK-la qarşılaşacaq. Komandalarımızdan nə gözləyirsiniz?

- Hər iki komandamızın qrupdan çıxmaq şansı var. “Qəbələ”də başa düşürlər ki, geriyə yol yoxdur, ancaq hər iki görüşdə qalib gəlməklə qrupdan çıxmaq şansları var. Yəqin ki, meydana da bu motivasiya ilə çıxacaqlar. Düzdür, rəqiblər çox güclüdür, ancaq nəzərə almaq lazımdır ki, “Qəbələ” bu mərhələyə qədər çox güclü komandaları mübarizədən kənarlaşdırıb. Nə qədər də çətin olsa ümid edirik ki, komandamız hər iki görüşdə qalib gələ bilər. “Qarabağ”a gəldikdə isə həm komandamız, həm də “Tottenhem”in qrupdan çıxmaq şansı var. Çoxdandır arzuladığımız bir “Qarabağ” komandamız var. Məncə, “Qarabağ” əsl gücünü “Tottenhem” kimi bir rəqibə qarşı oyunda göstərəcək. Biz bunu arzulayırıq və gözləyirik.

Mənbə: qol.az