“Kəpəz”in qapıçısı: “Azərbaycan çempionatında heç də gözləmədiyim səviyyə ilə qarşılaşdım”

“Azərbaycan çempionatında heç də gözləmədiyim səviyyə ilə qarşılaşdım. Debüt oyunumun səviyyəsindən razıyam. Çempionatın ilk turu olsa da, futbolçular sona kimi mübarizə apardılar”. Futbolxeber.az saytına müsahibəsində bu sözləri “Kəpəz”in qapıçısı Tadas Simiatis deyib.

Litvalı qolkiper meydana qələbə üçün çıxdıqlarını bildirib: “Komandamız çox istəklidi. Hamımız qələbə qazanmaq istəyirik. Baş məşqçimiz də bizdən bunu tələb edir. Təbii ki, meydanda olduğumuz müddətdə bunu reallaşdırmaq üçün əlimizdən gələni edirik”.

Simiatis “Kəpəz”in azarkeşlərindən də söz açıb: “Azarkeşlərimiz haqda məlumatım var. Bilirəm ki, Gəncədə futbolu çox sevirlər. Gələn həftə doğma meydanımızda oynayacağıq. İnanıram ki, fanatlar bizi sona kimi dəstəkləyəcəklər”.

Litvalı qolkiper “Neftçi”yə qarşı baş tutan oyun (0:0) haqda bunları söyləyib: “Mövsümün ilk matçı idi. Komandalardan heç biri ideal oyun göstərə bilməz. Amma qarşılaşma maraqlı keçdi. Meydanda gərginlik də var idiş Son 20 dəqiqə azlıqda qalsaq da, qol buraxmadıq. Qırmızı vərəqə alan komanda yoldaşım Şəhriyar Əliyev də çox istəkli idi. Görünür, elə bu amil onun əlehinə işlədi. Qırmızı vərəqəni bilərəkdən almadı. Azad Kərimov da yaxşı futbolçudu. Meydana sonradan daxil olsa da, inamlı təsir bağışladı”.