“Bu mərhələdə zəif rəqib olmur”

“Qarabağ”ın baş məşqçisi Qurban Qurbanov Avropa Liqasının play-off mərhələsi çərçivəsində qarşılaşacaqları “Yanq Boyz” barəsində fikirlərini paylaşıb. Futbolxeber.az-ın Ağdam klubunun rəsmi saytına istinadən verdiyi məlumata görə, təcrübəli mütəxəssis deyib: “Avrokubokun bu mərhələsində zəif rəqib olmur. Püşkatmadan sonra “Yanq Boyz” haqda kiçik araşdırma apardım. Maraqlı komandadı. Zəngin Avropa təcrübəsinə malikdilər. Həmçinin, avrokuboklarda yaxşı nəticələri var. Ümumiyyətlə, püşkatmadan sonra rəqib barədə konkret fikir səsləndirmək çətindi. Rəqibin oyununu canlı görməmiş dəyərləndirmək çətin olur. Məncə, ilk qarşılaşmadan sonra onlar barədə hərtərəfli məlumatımız olacaq. Yəni rəqibi canlı görmək başqadı. Onun əsl gücünü onda görürsən.Bizi qarşıda “Qəbələ” ilə çətin çempionat oyun gözləyir. Həmçinin “Seltik”lə görüşü də hələ tam yaddan çıxarmamışıq. Yəni indidən yalnız “Yanq Boyz” haqda düşünmək doğru olmaz. Hazırda bütün diqqətimizi “Qəbələ” ilə matça yönəltmişik”.