Ruslan Abışov: "Çalışacağıq ki, xalqımızı bayram günlərində sevindirək"

Milli komandamızın və Rusiyanın "Rubin" klubunun müdafiəçisi Ruslan Abışov Futbolxeber.az saytına müsahibə verib.

- Ruslan, artıq bu gün millinin düşərgəsinə qoşuldun və 2 məşqdə iştirak etmisən. Təəssüratların necədi?

- Hər şey yaxşıdı. Millidə olduğum üçün sevinirəm. Qarşıda bizi vacib oyunlar gözləyir. Çalışacağıq ki, istədiyimiz nəticələri qazanaq.

- Komandadan ab-hava necədi?

- Ab-hava əladı. Uşaqlar bütün gücləri ilə qarşıdakı oyunlara hazırlaşırlar. Hər kəs işinə məsuliyyətlə yanaşır.

- Qarşıda millimizi Lüksemburq və Portuqaliya ilə oyunlar gözləyir. Bu matçlar haqda nə deyə bilərsən?

- Daha çox Lüksemburqla oyundan yaxşı nəticə gözləyirik.Çalışacağıq ki, səfərdə çıxış etməyimizə baxmayaraq, yaxşı nəticə edib, xalqımızı, azarkeşlərimizi bu bayram günlərində sevindirək. Hər kəs əlindən gələni edəcək ki, vətənə qələbə ilə dönək.

-  Portuqaliya ilə oyundan nə gözləyirsən?

- Çox çətin oyun olacaq. Rəqibin heyətində adlı-sanlı futbolçular var. Amma hazırda daha çox Lüksemburqla oyunu düşünürük. İnşallah, Lüksemburqdan istədiyimiz nəticə ilə ayrılaq, sonra diqqətimizi Portuqaliya ilə matçda yönəldəcəyik.

- Artıq bir müddətdir ki, "Rubuin"dəsən. Yeni komandanda işlərin necədir?

- Hər şey yaxşıdır. Məşqlərdə bütün gücümlə çalışıram. Bir müddət əvvəl əməliyyat keçirmişdim. İndi vəziyyətim daha yaxşıdır.

- Geridə qalan 2 tur ərzində adın "18-liy"ə düşmədi. Növbəti turda "Lokomotiv"lə qarşılaşacaqsınız. Həmin görüşdə səni meydanda görə biləcəyik?

- Mən də məhz bunun üçün çalışıram. Heyətə düşmək üçün əlimdən gələni edirəm. İndi özümü daha yaxşı hiss edirəm. Ümid edirəm ki, məhz "Lokomotiv"lə oyunda şans qazanacağam.